ریاض/دبئی(صباح نیوز) سعودی عرب اور متحدہ عرب امارت میں میں شدید گرمی کی لہر کے باعث جمعہ کے خطبات اور نماز کا دورانیہ مختصر کر دیا گیا۔عرب میڈیا کے مطابق شدید گرمی کے باعث مسجد الحرام اور مسجد نبوی میں جمعہ کا خطبہ اور نماز کا دورانیہ 15منٹ کیا گیا۔ متحدہ عرب امارات میں بھی شدید گرمی کے پیش نظر جمعہ کے خطبات کو مختصر کرنے کا حکم دے دیا ہے۔
متحدہ عرب امارات میں درجہ حرارت 50 ڈگری سینٹی گریڈ سے تجاوز کرنے کے بعد حکام نے ملک بھر کے اماموں سے کہا ہے کہ وہ جمعہ کے خطبے اور نماز کو 10 منٹ پر محدود رکھیں۔ اس ہدایت کا اطلاق جمعہ 28 جون سے اکتوبر تک ہوگا۔ جمعہ کا دن اسلام میں سب سے افضل دن ہے اس دن مساجد میں خصوصی باجماعت نمازوں کا اہتمام کیا جاتا ہے جسے جمعہ کہا جاتا ہے۔ بہت سے نمازیوں کو تپتی دھوپ میں صحن میں نماز ادا کرنی پڑتی ہے کیونکہ مساجد تیزی سے بھر جاتی ہیں۔ اس اقدام سے نمازیوں کو موسم گرما کے شدید درجہ حرارت سے بچایا جاسکے گا۔
دبئی اسپورٹس سٹی میں نماز جمعہ میں شرکت کرنے والے شامی شہری محمد یاسین نے کہا کہ مجھے امید ہے کہ آئمہ کرام مختصر آیات بھی پڑھیں گے تاکہ نماز کو ہر ایک کے لئے زیادہ سے زیادہ آسان بنایا جاسکے۔
