لاہور(صباح نیوز)لاہور سمیت پنجاب کے مختلف شہروں میں دھند چھائی رہی جس کے باعث حد نگاہ صفر ہو گئی ۔ موٹرویز مختلف مقامات پر بندی کردی گئیں ، لاہور ایئرپورٹ پر پروازوں کا شیڈول بھی متاثر ہو گیا ۔ دھند کی وجہ سے جدہ سے آنے والی سعودی ایئر لائن کی پرواز ایس وی 738 کو لینڈنگ کی اجازت نہ ملی اور طیارے کا رخ اسلام آباد ایئرپورٹ کی جانب موڑ دیا گیا۔شدید دھند کے باعث موٹر ویز کو متعدد مقامات سے بند کر دیا گیا،
موٹر وے ایم 2 لاہور سے کوٹ مومن تک ٹریفک کیلئے بند ہے جبکہ موٹر وے ایم 3 لاہور سے عبدالحکیم تک بھی بند کر دی گئی ۔موٹر وے ایم 4 پنڈی بھٹیاں سے ملتان تک ٹریفک کیلئے بند ہے، موٹر وے ایم 5 شیر شاہ سے روہڑی تک بند ہے جبکہ لاہور سیالکوٹ موٹر وے ایم 11 پر بھی ٹریفک کی نو انٹری ہے۔شدید دھند کی وجہ سے قومی شاہراہوں پر اور شہروں کے اندر بھی ٹریفک کی روانی متاثر ہو گئی ہے اور ٹریفک پولیس نے عوام سے غیر ضروری سفر سے گریز کرنے کی اپیل کی ہے جبکہ ڈرائیورز کو فوگس لائٹس کے استعمال کی بھی ہدایت کی گئی ۔
