لاہور(صباح نیوز)بجلی سستی کرانے کیلئے لاہور ہائیکورٹ میں درخواست دائر کر دی گئی۔درخواست شہری شیخ لطیف شاہد کی جانب سے دائر کی گئی، درخواست میں سیکرٹری توانائی اینڈ پاور ڈویژن اور چیئرمین نیپرا کو فریق بنایا گیا۔
درخواست میں موقف اختیار کیا گیا کہ دن بدن بجلی کی بڑھتی قیمتوں سے غریب آدمی کا جینا محال ہو چکا ہے،بجلی کے بھاری بل ادا نہ ہونے پر مساجد کو تالے لگ گئے ۔ موقف اختیار کیا گیا کہ بجلی بلوں میں ایک یونٹ کے فرق پر ہزاروں روپے اضافہ غیر قانونی ہے۔درخواست میں کہا گیا کہ بجلی بلوں میں بھاری اضافے کی وجہ سے عوام گھر کا سامان بیچنے پر مجبور ہوگئے۔
حکومت نے غیر قانونی طور پر بجلی بلوں میں فکس ٹیکس نافذ کیا، مہنگائی کی وجہ سے عوام شدید پریشان اور مشکلات کا شکار ہیں، اعلی عدالتیں بجلی کے مختلف ٹیکسوں کی وصولی غیر قانونی قرار دے چکی ہیں۔درخواست میں عدالت سے استدعا کرتے ہوئے کہا گیا کہ عدالت بجلی بلوں میں اضافی چارجز کی وصولی کالعدم قرار دے۔
