اسلام آباد(صباح نیوز)چیئرمین سینیٹ سید یوسف رضا گیلانی نے کہا ہے کہ جمہوری طرز عمل کے فروغ میں پارلیمانی ادارے اہم کردار ادا کرتے ہیں۔
چیئرمین سینیٹ سید یوسف رضا گیلانی نے پارلیمانی نظامِ حکومت کے عالمی دن پر پیغام میں دنیا بھر کی تمام پارلیمانوں کو مبارکباد پیش کی ہے ،انہوں نے کہا کہ یہ دن انتہائی اہمیت کا حامل کیونکہ اسی دن بین الپارلیمانی یونین کی سالگرہ بھی منائی جا رہی ہے۔
یوسف رضا گیلانی نے کہا کہ جمہوری طرز عمل کے فروغ میں پارلیمانی ادارے اہم کردار ادا کرتے ہیں۔ سید یوسف رضا گیلانی نے کہا کہ آج ہمیں بطور پارلیمنٹیرینز پارلیمانی جمہوریت کی اقدار کو برقرار رکھنے کے عزم کا اعادہ کرنے کی ضرورت ہے اور ہمیں مکالمے اور باہمی احترام کو فروغ دینے کے ساتھ ساتھ معاشروں کو فائدہ پہنچانے والی قانون سازی کے ایجنڈے کو آگے بڑھانے کے لئے انتھک محنت کرنی چاہیے۔ چیئرمین سینیٹ نے کہا کہ پارلیمانی طرز حکمرانی کے لیے غیر متزلزل وابستگی آنے والی نسلوں کے روشن مستقبل کی تشکیل میں اہم کردار ادا کرتی ہے۔
سید یوسف رضا گیلانی نے کہا کہ موسمیاتی تبدیلی، دہشت گردی،انتہا پسندی، بڑھتے ہوئے تنازعات و دیگر چیلنجز جو اقوام عالم کی بقا کے لیے خطرہ بنتے جارہے ہیں ان سے نمٹنے کے لئے ایک موثر فریم ورک اور اجتماعی نقطہ نظر کی اشد ضرورت ہے۔انہوں نے کہا کہ پاکستان کی پارلیمنٹ امن، ترقی اور خوشحالی کو فروغ دینے کے لئے دنیا بھر کی پارلیمانوں کے ساتھ ہے۔
