اسلام آباد(صباح نیوز)پاکستان تحریکِ انصاف کے رہنما اسد قیصر نے جے یو آئی کے سربراہ مولانا فضل الرحمن سے ملاقات کی ہے،ملاقات میں قومی اسمبلی میں مل کر بھرپور اپوزیشن کا کردار ادا کرنے پر اتفاق کیا گیا۔
ملاقات میں تحریکِ انصاف کے مرکزی ڈپٹی سیکریٹری اطلاعات اخونزادہ حسین یوسفزئی بھی شریک تھے۔ملاقات میں ملک کی مجموعی سیاسی صورتِ حال پر گفتگو ہوئی اور دونوں رہنماؤں نے ملک بالخصوص کے پی میں امن و امان کی صورتِ حال پر تشویش کا اظہار کیا۔ دونوں رہنماؤں نے گفتگو کرتے ہوئے کہا کہ خیبر پختون خوا میں امن و امان کی صورتِ حال ابتر ہو چکی، صوبے میں امن کے لیے سیاسی جماعتوں کو کردار ادا کرنا ہو گا، فوجی آپریشن کسی مسئلے کا حل نہیں۔دونوں جماعتوں نے قومی اسمبلی میں مل کر بھرپور اپوزیشن کا کردار ادا کرنے پر اتفاق کیا اور بجٹ کو آئی ایم ایف بجٹ اور عوام دشمن قرار دے کر مسترد کر دیا۔
اسد قیصر اور مولانا فضل الرحمن نے افغانستان کے ساتھ برادرانہ تعلقات کے قیام کے لیے کردار ادا کرنے پر اتفاق اور افغانستان کے ساتھ کراسنگ پوائنٹس پر اقتصادی راہداری قائم کرنے کا مطالبہ کیا۔ملاقات میں دونوں جماعتوں کے درمیان سیاسی کمیٹی قائم کرنے کا بھی فیصلہ ہوا۔کمیٹی دونوں جماعتوں کے درمیان تحفظات دور کرنے اور سیاسی حکمت عملی کے لیے نکات طے کرے گی۔
