راولپنڈی(صباح نیوز)اینٹی نارکوٹکس فورس( اے این ایف) نے آٹھ کارروائیوں میں 65.928 کلومنشیات برآمد کر لی ،7ملزمان گرفتار کر لئے ۔ترجمان اے این ایف کے مطابق ان کارروائیوں میں ایک کروڑ روپے سے زائد مالیت کی 65.928 کلوگرام منشیات برآمد کی گئیں ۔
اسلام آباد میں بس سٹاپ کے قریب ملزم سے 1.4 کلو گرام چرس برآمد کی گئی ۔اسلام آباد میں بحریہ ٹائون کے قریب دو ملزمان سے 30 ایکسٹیسی گولیاں برآمد کی گئیں ۔ ترجمان نے بتایاکہ گرفتار ملزمان نے تعلیمی اداروں کے طلبا کو منشیات فروخت کرنے کا اعتراف بھی کیا ہے ۔دیگر کارروائیوں میں اسلام آباد میں کوریئر آفس کے ذریعے مالدیپ بھیجے جانے والے پارسل سے 112 گرام آئس برآمد کی گئی ۔ اسلام آباد میں F/17 سوسائٹی کے قریب 3.6 کلو گرام افیون اور 48 کلو گرام چرس برآمد کی گئی ۔
بلوچستان کے علاقے گوادر میں ملزم سے 6 کلو گرام آئس برآمد کی گئی ۔ایم ٹو اسلام آباد پر گاڑی میں چھپائی گئی 2 کلوگرام ہیروئن برآمدکرکے ایک ملزم گرفتار کیاگیا۔اقبال شہید ٹول پلازہ اٹک کے قریب موٹرسائیکل میں چھپائی گئی 1.8 کلو گرام چرس برآمدکرکے ایک ملزم گرفتار کیاگیا ۔بلیلی کوئٹہ کے قریب گاڑی کے خفیہ خانوں سے 3 کلو گرام آئس برآمد کی گئی اور دوران کاروائی افغان باشندہ گرفتار کیاگیا ۔ترجمان اے این ایف نے بتایاکہ گرفتار ملزمان کے خلاف انسداد منشیات ایکٹ کے تحت مقدمات درج کر کے تحقیقات کا آغاز کر دیا گیا ۔
