سرینگر: نئی دہلی کی تہاڑ جیل میں پھانسی پانے والے کشمیری رہنما میں محمد افضل گورو کی برسی پر کل مقبوضہ کشمیر میں مکمل ہڑتال کی جائے گی جبکہ جموں و کشمیر لبریشن فرنٹ کے بانی شہید کشمیر محمد مقبول بٹ کی برسی پر 11 فروری بروزہفتہ بھی مکمل ہڑتال کی جائے گی۔ ہڑتال کی کال کل جماعتی حریت کانفرنس اورجموں و کشمیر لبریشن فرنٹ نے دی ہے جبکہ دیگر تمام حریت رہنماوں اور تنظیموں نے کال کی حمایت کی ہے۔بھارت نے تحریک آزادی میں نمایاں کردار کی پاداش میں محمد افضل گورو کو 9 فروری 2013 کو جبکہ محمد مقبول بٹی کو 11فروری 1984 کونئی دہلی کی بدنام زمانہ تہاڑ جیل میں تختہ دار پر لٹکایا تھا۔ ان کی لاشیں جیل کے احاطے میں ہی دفن کی گئی تھیں۔
کل جماعتی حریت کانفرنس کے ترجمان نے سرینگر میں جاری ایک بیان میں مقبول محمد بٹ اور محمد افضل گورو کو زبردست خراج عقیدت پیش کرتے ہوئے کہا کہ دونوں رہنماوں کی شہادت نے تحریک آزادی کشمیر میں ایک نئی روح پھونکی ہے ۔ انہوں نے کہا کہ کشمیری عوام اپنے شہداکی قربانیوں کو رائیگاں نہیں جانے دیں گے اور ان کے مشن کو ہر قیمت پر پورا کریں گے۔
ترجمان نے اقوام متحدہ پر زور دیا کہ وہ مقبوضہ کشمیر کے عوام پر بھارتی مظالم کا نوٹس لے اور بھارت کو کشمیریوں کو ان کا حق خودارادیت دے کر تنازعہ کشمیر کو حل کرنے پر مجبور کرے۔جموں وکشمیر لبریشن فرنٹ نے بھی ایک بیان میں محمد مقبول بٹ اور محمد افضل گورو کو خراج عقیدت پیش کیا۔بیان میں تمام محمد یاسین ملک سمیت مقبوضہ جموں وکشمیر اور بھارتی جیلوں میں قید تمام کشمیریوں کی فوری رہائی کا مطالبہ کیا جموں وکشمیر لبریشن فرنٹ نے ایک بیان میں محمد مقبول بٹ اور محمد افضل گورو کو خراج عقیدت پیش کیاہے۔
لبریشن فرنٹ نے مقبوضہ جموں وکشمیر، آزاد جموں و کشمیر ، گلگت بلتستان اور دنیا بھر میں مقیم کشمیریوں سے اپیل کی ہے کہ وہ دونوں رہنمائوں کے ایام شہادت پر بھارت کے خلاف اپنا احتجاج درج کرائیں۔ بیان میں بیرون ملک مقیم کشمیریوں پرزوردیاگیا ہے کہ وہ جموں وکشمیر لبریشن فرنٹ کے چیئرمین محمد یاسین ملک سمیت مقبوضہ جموں وکشمیر اور بھارت کی مختلف جیلوں میں غیر قانونی طور پر نظر بندتمام کشمیریوں کی فوری رہائی کے لیے اپنی آواز بلند کریں۔
