کراچی(صباح نیوز)امیرجماعت اسلامی کراچی حافظ نعیم الرحمن نے کہا ہے کہ شدید گرمی میں عوام پانی کی تلاش میں مارے مارے پھررہے ہیں،وفاقی وصوبائی حکومت کوئی بھی مسئلہ حل کرنے کو تیار نہیں،واٹر بورڈ کی بے حسی و نااہلی کے خلاف20مئی کو واٹر بورڈ کے ہیڈ آفس پر تاریخی دھرنا دیں گے اور حکمران جواب دیں کہ کے فور منصوبہ 650ملین گیلن سے 260ملین گیلن کیسے ہوا؟،2005میں سابق سٹی ناظم نعمت اللہ خان نے 100ملین گیلن کا K3منصوبہ مکمل کیا،آج 17سال ہوگئے لیکن کسی بھی حکومت نے کے فور منصوبہ مکمل نہیں کیا،بدقسمتی سے حکمران جماعتیں صرف ذاتی مفاد ات کی باتیں کرتی ہیں کسی کو بھی کراچی سے کوئی دلچسپی نہیں،وفاقی و صوبائی حکومتوں سے کراچی کے ساڑھے تین کروڑ عوام کے جائز اور قانونی حقوق کے حصول اور مسائل کے حل کے لیے اتوار 29مئی کو مزار قائد سے”حقوق کراچی کارواں” نکالا جائے گا،جماعت اسلامی نے کراچی کے میئر کو بااختیار بنانے کے لیے سندھ اسمبلی کے باہر 29دن کا تاریخی دھرنا دیا گیااور اپنے مطالبات منظور کروائے تھے،ایک مرتبہ پھر سے ایم کیو ایم اور پیپلزپارٹی ایک ہوگئے ہیں،اگر پیپلزپارٹی نے معاہدے عمل درآمد میں ٹال مٹول کی کوشش کی تو ہم پھر سے وزیر اعلیٰ ہاؤس کا گھیراؤ کریں گے اور مطالبات کے ایک ایک شق کو منظور کروائیں گے۔
ان خیالات کا اظہار انہوں نے جماعت اسلامی ضلع قائدین کے تحت پی ای سی ایچ ایس سوسائٹی نورگراؤنڈ میں ”فیملی عید ملن”سے خطاب کرتے ہوئے کیا۔عید ملن میں بلدیاتی انتخابات کے لیے یوسی چیئرمین و وائس چیئرمین کے امیدواروں کا اعلان بھی کیا گیا۔تقریب سے امیرجماعت اسلامی ضلع قائدین سیف الدین ایڈوکیٹ نے بھی خطاب کیا۔
اس موقع پر نائب امراء ضلع نصیر اللہ حسینی،جنید مکاتی، سکریٹری ولید احمد ودیگر بھی موجود تھے۔حافظ نعیم الرحمن نے خطاب کرتے ہوئے مزیدکہاکہ جماعت اسلامی اس تحریک کا نام ہے جس کی بنیاد زبان اور فرقہ پرستی نہیں کوئی بھی کسی بھی مسلک یا فرقے سے تعلق رکھتا ہو جماعت اسلامی کی تحریک میں شامل ہوسکتا ہے، جماعت اسلامی میں منارٹی ونگ کا شعبہ بھی موجود ہے جس میں اقلیتی برادری کے افراد جماعت اسلامی سے منسلک ہیں۔قومی انتخابات میں کراچی کے عوام نے پی ٹی آئی کو جھولی بھر بھر کے ووٹ دیے،کراچی سے پی ٹی آئی کے 14ایم این ایز منتخب ہوئے ہیں اس کے باوجود کراچی کے مسائل حل نہیں ہوئے،کراچی کے عوام جانتے ہیں کہ کراچی کے مسائل حل کرنے کی صلاحیت صرف اور صرف جماعت اسلامی کے پاس ہے، اس لیے ہم تمام سیاسی جماعتوں کے ورکرز کو دعوت دیتے ہیں کہ جماعت اسلامی کی حق دوکراچی تحریک میں شامل ہوجائیں اور کراچی کی تعمیر و ترقی میں جماعت اسلامی کا ساتھ دیں۔
سیف الدین ایڈوکیٹ نے کہاکہ آنے والے بلدیاتی انتخابات شہر کے مستقبل کے لیے نہایت ہی اہمیت کے حامل ہیں،کراچی اس وقت مختلف مسائل میں گھرا ہوا ہے اس لیے ضروری ہے کہ بلدیاتی امید وار ان بلا تاخیر پنے اپنے حلقہ جات میں عوامی رابطہ مہم کر تیز کریں، علاقے کی سطح پر مسائل کے حل کے لیے جدوجد کو مزید تیز کریں،کارکنان حق دوکراچی تحریک کے پیغام کو گھر گھر جاکر عام کریں۔
