ظاہر جعفر کو سزائے موت،یہ ہے وہ انصاف جس کی توقع پاکستانی عوام کرتے ہیں،فواد چوہدری

ماسکو(صباح نیوز)وفاقی وزیر برائے اطلاعات و نشریات فواد چوہدری نے نور مقدم قتل کیس کے مرکزی مجرم ظاہر جعفر کو سزائے موت کے عدالتی فیصلے پر کہا کہ یہ ہے وہ انصاف جس کی توقع پاکستانی عوام کرتے ہیں۔

انہوں نے سوشل میڈیا پر جاری بیان میں کہا کہ نور مقدم کیس میں پولیس اور پراسیکیوشن نے ذمہ داری پوری کی اور عدالت نے چار ماہ میں فیصلہ سنایا۔

وفاقی وزیر نے کہا کہ یہ ہے وہ انصاف جس کی توقع پاکستانی عوام کرتے ہیں، امید ہے انصاف سے جڑے ادارے عوام کی توقعات پر پورا اتریں گے اور رول آف لا نافذ ہو گا۔

واضح رہے کہ اسلام آباد کی ڈسٹرکٹ اینڈ سیشن کورٹ نے نور مقدم قتل کیس کا فیصلہ سناتے ہوئے مجرم ظاہر جعفر کو سزائے موت سنا دی ہے۔عدالت نے مجرم ظاہر جعفر کے ملازم مالی جان محمد اور چوکیدار افتخار کو 10، 10 سال قید کی سزا سنائی۔

قبل ازیں وفاقی وزیراطلاعات فواد چوہدری  نے وزیراعظم عمران خان کے دورہ روس سے متعلق قیاس آرائیوں کے حوالے سے اپنے ایک اور پیغام میں کہا کہ وزیراعظم دورہ روس پر ہیں اور اس سے متعلق قیاس آرائیاں درست نہیں۔