اسلام آباد(صباح نیوز) وفاقی وزیر برائے منصوبہ بندی، ترقی و خصوصی اقدامات پروفیسر احسن اقبال نے کہا ہے کہ پانی زندگی کی روح ہے اور ترقی یافتہ معیشتوں کی بنیاد بھی ہے۔ موسمیاتی تبدیلیوں کے باعث ایک طرف تباہ کن سیلابوں کا خطرہ بڑھ رہا ہے، تو دوسری طرف پانی کے ذخائر میں کمی زراعت، صنعت، توانائی اور روزمرہ زندگی کو متاثر کر رہی ہے۔
عالمی یوم آب پر اپنے پیغام میں وفاقی وزیر نے کہا کہ اڑان پاکستان کے فائیو ایز وژن کے تحت ہم پائیدار ترقی کی طرف بڑھ رہے ہیں، جس میں ماحول ایک کلیدی ستون ہے۔ حکومتِ پاکستان پانی کے وسائل کے مثر انتظام کے لیے مربوط اقدامات کر رہی ہے، جن میں نئے ڈیمز کی تعمیر، آبپاشی کے جدید نظام، پانی کی ری سائیکلنگ، اور سمارٹ واٹر مینجمنٹ ٹیکنالوجیز شامل ہیں۔انہوں نے کہا کہ ہم جانتے ہیں کہ ایکسپورٹ اورئنٹیشن، مساوات اور توانائی کے اہداف بھی پانی کی مثر دستیابی سے جڑے ہیں۔
توانائی کے حصول، زرعی برآمدات، اور سماجی انصاف سب پانی کے دانشمندانہ استعمال سے ممکن ہیں۔احسن اقبال نے عالمی دن پر قوم سے اپیل کی ہے کہ پانی کے ضیاع سے گریز کریں، اسے ذمہ داری اور دانشمندی سے استعمال کریں۔اپنے گھروں، دفاتر، کارخانوں اور کھیتوں میں پانی کے تحفظ کو اپنی قومی ذمہ داری سمجھیں۔آیئے ہم سب مل کر ایسے اقدامات کریں جو آنے والی نسلوں کو ایک صاف، محفوظ اور وافر پانی دینے والے پاکستان کی ضمانت دیں،ایک ایسا پاکستان جو ماحول دوست، پائیدار اور ترقی یافتہ ہو۔
