لاہور(صباح نیوز)پنجاب بھر میں دھندچھائی رہی ، موٹرویز مختلف مقامات پر بندکردی گئیں ۔ترجمان موٹروے پولیس کے مطابق موٹروے ایم 2 لاہور سے کوٹ مومن تک دھند کی وجہ سے بند کردی گئی۔موٹر وے ایم 3 عبد الحکیم تک، ایم 4 فیصل آباد سے شور کوٹ تک، ایم 5 رحیم یار خان سے گھوٹکی تک بند ہے جبکہ لاہور سیالکوٹ موٹروے ایم 11 بھی دھند کی وجہ سے بند ہے۔
حد نگاہ کم ہونے کے باعث قومی شاہراہوں پر ٹریفک کی روانی متاثر ہوئی ۔حکام نے کہا کہ صبح 10 سے شام 6 بجے تک، دھند کے موسم میں بہترین سفری اوقات ہیں، ڈرائیور حضرات فوگ لائٹس کا استعمال کریں، عوام غیر ضروری سفر سے گریز کریں۔ترجمان موٹروے نے بتایا کہ موٹرویز کو عوام کی حفاظت اور محفوظ سفر یقینی بنانے کے لئے بند کیا جاتا ہے، دھند میں لین کی خلاف ورزی حادثات کا سبب بن سکتی ہے، روڈ یوزرز دھند میں لین ڈسپلن کو یقینی بنائیں۔موٹروے پولیس نے ڈرائیوز سے اپیل کی ہے کہ تیز رفتاری سے پرہیز کریں اور اگلی گاڑی سے مناسب فاصلہ رکھیں جبکہ معلومات اور مدد کے لیے ہیلپ لائن 130 سے رابطہ کریں۔
