کابل (صباح نیوز)افغانستان میں آئل ٹینکر اور ٹرک کے ساتھ دو بسوں کے تصادم کے نتیجے میں 52 افراد ہلاک جبکہ 65 زخمی ہوگئے۔ افغانستان میں دارالحکومت کابل سے قندھار جانے والی مسافر بردار دو بسوں کے الگ الگ حادثے میں بڑے پیمانے پر جانی نقصان ہوا ہے۔
عالمی خبر رساں ادارے کے مطابق یہ دونوں حادثات کابل سے قندھار جاتے ہوئے درمیان میں صوبے غزنی کی مرکزی شاہراہ پر پیش آئے۔ پہلے حادثے میں ایک مسافر بس فیول ٹینکر سے ٹکرا گئی جب کہ اسی شاہراہ پر دوسرے حادثے مسافر بس اور ٹرک میں خوفناک تصادم ہوا ہے۔ صوبہ غزنی کے گورنر کے ترجمان حافظ عمر نے بتایا کہ دونوں حادثات میں مجموعی طور پر 52افراد جاں بحق اور 65 سے زائد زخمی ہوگئے۔ طالبان حکومت کے ترجمان ذبیح اللہ مجاہد نے بتایا کہ متعلقہ حکام سے دونوں واقعات کی فوری تحقیقات کرنے، وجوہات کی نشاندہی کرنے اور مستقبل میں ایسے سانحات کو روکنے کی ہدایت کی گئی ہے۔
ذبیح اللہ مجاہد نے مزید بتایا کہ زخمیوں کو غزنی کے مختلف اسپتالوں میں لے جایا گیا جب کہ شدید زخمی مسافروں کو کابل منتقل کیا جا رہا ہے۔ حادثے میں جاں بحق ہونے والوں میں خواتین اور بچے بھی شامل ہیں۔ درجن سے زائد مسافروں کی حالت نازک ہونے کے باعث ہلاکتوں میں اضافے کا خدشہ ہے۔ یاد رہے کہ دہائیوں سے جنگ زدہ افغانستان میں ٹریفک حادثات عام ہیں جس کی وجہ خراب سڑکیں،
ہائی ویز پر خطرناک ڈرائیونگ، اور ٹریفک قوانین کی پاسداری نہ کرنا ہے۔ رواں برس مارچ میں جنوبی صوبہ ہلمند میں ایک بس آئل ٹینکر سے ٹکرانے سے خوفناک آگ میں جھلس کر 20سے زائد افراد جاں بحق اور 38 زخمی ہوگئے تھے۔ایک اور خطرناک حادثہ دسمبر 2022 ء میں سالانگ پاس پر بھی پیش آیا تھا، جس میں ایک آئل ٹینکر تیزرفتاری کے بعد الٹ گیا تھا اور اس میں آگ لگ گئی تھی، اس حادثے میں 31افراد جاں بحق جبکہ درجنوں زخمی ہوئے تھے۔
