اسلام آباد(صباح نیوز)چیئرمین سینیٹ سید یوسف رضا گیلانی نے کہا ہے کہ سپین کی سینیٹ کے وفد کا دورہ ،پاکستان اور سپین کے بڑھتے ہوئے تعلقات کی عکاسی کرتا ہے۔پاکستان اور سپین کے دوطرفہ تعلقات کی بنیاد باہمی احترام، مشترکہ اقدار کے جذبات پر مبنی ہے۔
ان خیالات کا اظہار چیئرمین سینیٹ نے سپین کی سینیٹ 4رکنی وفد سے پارلیمنٹ ہا س میں ملاقات کے دوران کیا ۔وفد چیئرمین سینیٹ سید یوسف رضا گیلانی کی خصوصی دعوت پر پاکستان کے 5روزہ دورے پر ہے۔چیئرمین سینیٹ نے سپین کی سینیٹ کے وفد کو پارلیمنٹ ہا س آمد پر خوش آمدید کہا۔سپین کے پارلیمانی وفد سے ملاقات میں سید یوسف رضا گیلانی نے کہا کہ سال 2010میں بطور وزیراعظم سپین کا دورہ کیا تھا۔سپین اور یورپی یونین کے اعلی حکام سے پاکستان کی ٹیکسٹائل کی صنعت کے حوالے سے تبادلہ خیال ہو ا تھا اورWTOکے ہیڈ کوارٹر کا بھی دورہ کیا تھا ان ملاقاتوں میں بین الا قوامی منڈیوں تک رسائی کے حوالے سے مثبت پیش رفت ہوئی تھی۔
چیئرمین سینیٹ سید یوسف رضا گیلانی نے کہا کہ بین الپارلیمانی تعلقات دوطرفہ روابط کو مزید مستحکم کرنے میں مددگار ثابت ہونگے۔سپین کی سینیٹ کی جانب سے پارلیمانی سفارت کاری کے تحت روابط کو فروغ دینے کے جذبے کی قدر کرتے ہیں۔چیئر مین سینیٹ نے سپین اور پاکستان کے جمہوری طرز حکمرانی اور پارلیمانی خود مختاری کے مشترکہ عزم کی تعریف کی ۔ انہوں نے کہا کہ وفود کے تبادلوں میں تیزی لانے سے ادارہ جاتی تعاون کو مزید تقویت ملے گی۔ چیئرمین سینیٹ نے کہا کہ پاکستان کی سینیٹ میں پاکستان سپین دوستی گروپ تشکیل دیا جا چکا ہے
اور پارلیمانی سفارت کاری کے ذریعے دوطرفہ تعاون کو مزید مستحکم کرنے کے خواہاں ہیں چیئرمین سینیٹ سید یوسف رضا گیلانی نے کہا کہ ٹیکسٹائل زرعی اشیااور دیگر سیکٹر ز میں تجارتی تعلقات انتہائی اہمیت کے حامل ہیں۔ انہوں نے کہا کہ ثقافتی اور تعلیمی شعبوں میں تعاون عوامی سطح پر روابط کو فروغ دے گا۔ چیئرمین سینیٹ نے مزید کہا کہ سپین میں مقیم پاکستانی دونوں ممالک کے درمیان دو طرفہ تعاون کو فروغ دینے میں کلیدی کردار ادا کر رہے ہیں۔چیئرمین سینیٹ سید یوسف گیلانی نے کہا کہ موسمیاتی تبدیلیوں کے مسائل پر قابو پانے کیلئے مشترکہ لائحہ عمل اپنانا ہوگا۔
زراعت سمیت دیگر شعبوں میں پاکستان اور سپین ٹیکنالوجی سے استعفادہ ہونے کیلئے معاونت بڑھا سکتے ہیں۔ چیئرمین سینیٹ نے وفد کی توجہ کشمیر اور فلسطین میں جاری مظالم کی جانب مبذول کرائی ۔پاکستان اور سپین کے مابین کثیر الجہتی تعاون انتہائی اہم ہے۔انہوں نے کہا کہ بین الا قوامی فورمز پر بھی دونوں ممالک ایک دوسرے کے ساتھ تعاون کیلئے پر عزم ہیں۔سپین کے پارلیمانی وفد سے ملاقات کے دوران سینیٹر انوشہ رحمان اور سینیٹر آغا شاہ زیب درانی بھی موجود تھے۔ ملاقات میں چیئرمین سینیٹ نے ایوان بالاکے تاریخی اور پارلیمانی سفر پر بھی آگاہ کیا اور ادارہ جاتی تعاون کو مزید بڑھانے کی اہمیت کو اجاگر کیا ۔انہوں نے تجارتی شعبے میں بھی اقدامات اٹھانے پر زور دیا تاکہ دوطرفہ تجارت کو مزید وسعت دی جاسکے ۔
