اسلام آباد(صباح نیوز) کل جماعتی حریت کانفرنس آزاد کشمیر کے جنرل سیکرٹری ایڈووکیٹ پرویز احمد نے کہا ہے کہ جنیوا میں اقوام متحدہ کے انسانی حقوق کے 56ویں اجلاس کے موقع پر مقبوضہ کشمیر پر بھارت کے غاصبانہ قبضہ ، کشمیری عوام کے حق خود ارادیت اور کشمیری قیدیوں کی حالت زار کے بارے اقوام متحدہ کو باخبر کیا جائے گا۔ انہوں نے کہا کہ بھرپور کوشش کی جائے گی کہ اقوا م متحدہ میں مقبوضہ کشمیر اور بھارت کے دیگر جیلوں میں کشمیری قیدیوں پر ہونے والے مظالم سے آگا ہ کیا جائے گا تاکہ اقوام متحدہ کا انسانی حقوق کونسل بھارتی ظلم کا نوٹس لیتے ہوئے کشمیری سیاسی قیدیوں کو رہا کرانے کیلئے اقدامات اٹھائیں۔
ان خیالات کا اظہار حریت کانفرنس آزاد کشمیر کے شاخ جنرل سیکرٹری پرویز احمد شاہ نے جینوا روانہ ہونے سے قبل میڈیا سے گفتگو کرتے ہوئے کیا۔ انہوں نے کہا کہ بھارت نے کشمیری سیاسی قیدیوں کے حقوق کو صلب کررکھا ہے اور انہیں علاج معالجے اور دیگر سہولیات سے یکسر محروم کررکھا ہے جس کی وجہ سے کشمیری قیدی مختلف موذی امراض میں مبتلا ہوچکے ہیں ۔ان قیدیوں کو بھارت کے جیلوں میں جرائم پیشہ اور ہندو ذہنیت اور فرقہ پرست جنونیوں کے ساتھ رکھا گیا اور انہیں طرح طرح کی اذیتیں دی جارہی ہیں۔ انہوں نے کہا کہ اس طرح بھارت نے قیدیوں کے معاملے میں عالمی قوانین کی دھجیاں بکھیر کررکھ دی ہیں۔ جنرل سیکرٹری نے کہا کہ بھارتی جیلوںمیں نظر بند کشمیری قیدیوں کی حالت زار پر انتہائی تشویش کا اظہار کرتے ہوئے کہا کہ بھارت میں بے گناہ کشمیری قیدیوں کو جو جرم بے گناہی میں نظر بند ہیں کے ساتھ ظالمانہ سلوک روا رکھا جارہا ہے۔ انہوںنے کہا کہ بھارت نے ان سیاسی قیدیوں کے عزم کو توڑنے کیلئے اس شدید گرمی کے موسم میں بھی حبس بے جا میں رکھا ہے اور انہیں ذہنی اور جسمانی تشدد کا نشانہ بنایا جارہا ہے تاکہ وہ اپنے پیدائشی حق سے دستبردار ہوسکیں۔
حریت رہنما نے کشمیری قیدیوں کے جذبہ حریت کو سراہتے ہوئے کہا کہ انہوں نے استقامت اور اپنے حق پر قائم رہتے ہوئے کشمیریوں کے سر فخر سے بلند کئے ہیں ۔ ایڈووکیٹ پرویز نے کہا کہ کشمیری قیدیوں کی استقامت تحریک آزادی کشمیر کی ضمانت ہے ۔انہوں نے کہا کہ اقوام متحدہ کی انسانی حقوق کونسل اور انسانی حقوق کی بین الاقوامی تنظیموں کو کشمیری نظربندوں کی حالت زار کا فوری نوٹس لینا چاہیے اور بھارتی حکومت پر دبا ڈالنا چاہیے اور مقبوضہ کشمیر اور بھارتی جیلوں میں نظر بند کشمیری رہنمائوںمسرت عالم بٹ،شبیر احمد شاہ، محمد یاسین ملک، آسیہ اندرابی، ڈاکٹر قاسم فکتو، فہمیدہ مرزا، پیر سیف اللہ اور دیگر نظر بندوں کی فوری رہائی کیلئے اپنا اثر و رسوخ استعمال کریں۔
