اسلام آباد(صباح نیوز)توہین الیکشن کمیشن کیس میں پاکستان تحریک انصاف کے سیکرٹری جنرل اسد عمر نے سپریم کورٹ آف پاکستان میں تحریری جواب جمع کرا دیا۔
سپریم کورٹ آف پاکستان میں عمران خان ، اسد عمر ، فواد چوہدری کیخلاف توہین الیکشن کمیشن کیس میں اسد عمر نے تحریری جواب جمع کراتے ہوئے کہا کہ الیکشن کمیشن کا شوکاز نوٹس غیر قانونی، غیر آئینی ہے، آرٹیکل 204 اعلی عدلیہ کو توہین عدالت کی کارروائی کا اختیار دیتا ہے۔
تحریک انصاف کے مرکزی رہنما نے کہا کہ الیکشن کمیشن عدالت نہیں اور آرٹیکل 204 کے تحت توہین عدالت کا اختیار استعمال نہیں کر سکتا، الیکشن ایکٹ کا سیکشن 10 آئین سے متصادم ہے۔
اسد عمر نے استدعا کی کہ الیکشن ایکٹ کا سیکشن 10 غیر آئینی قرار دیا جائے اور الیکشن کمیشن کی اپیل مسترد کی جائے۔
