اسلام آباد(صباح نیوز)سینیٹ اجلاس احتجاج کی نذرہوگیا، وزیرمملکت علی محمد خان نے قومی اسمبلی کارروائی میں اپوزیشن کے کردار پرتنقید کی تو اپوزیشن نے حکومتی رویے پر اعتراض کرتے ہوئے ایوان سے واک آؤٹ کردیا، کورم پورا نہ ہونے پراجلاس ملتوی کردیا گیا۔
سینیٹ اجلاس پرزائیڈنگ افسر سینیٹر فیصل سلیم کی زیر صدرات ہوا، سینیٹ میں قائد حزب اختلاف یوسف رضا گیلانی نے کہا کہ لوگوں کومظاہروں پراکسایا جا رہا ہے۔ قومی اسمبلی میں منی بجٹ کو بلڈوز کیا گیا ۔
قائد ایوان شہزاد وسیم بولے کبھی سنتے ہیں عدم اعتمادآئیگا توکبھی دوسری دھمکیاں دی جاتی ہیں۔ساری کی ساری دھمکیاں غیرموثرہوگئیں، وزیر مملکت علی محمد خان نے کہا قومی اسمبلی میں اسپیکر کے ساتھ جورویہ رکھا گیا ایسا کبھی نہیں ہوا۔
اسی دوران سینیٹرعینی مری نے کورم کی نشاندہی کردی۔ ایوان میں گھنٹیاں بجائی گئیں لیکن کورم پورا نہ ہونے پر اجلاس پیر کی سہ پہر 3بجے تک ملتوی کردیا گیا۔
