اسلام آباد(صباح نیوز)چیف جسٹس سپریم کورٹ آف پاکستان جسٹس گلزار احمد نے کہا ہے کہ حکومت ذ مہ داریاں پوری نہیں کر رہی، بوجھ عدالتوں پر پڑ رہا ہے۔سپریم کورٹ میں سابق جج جسٹس شبر رضا رضوی کی کتاب کی تقریب کی رونمائی ہوئی۔
تقریب سے خطاب کرتے ہوئے چیف جسٹس پاکستان جسٹس گلزار احمد نے کہا کہ حکومت کی جانب سے ذمہ داریاں پوری نہ کرنے کے باعث عدالتوں پر بوجھ پڑ رہا ہے، لوگوں کے بنیادی حقوق سلب ہو رہے ہیں۔انہوں نے کہا کہ حکومت وہ چھوٹے اور عام کام نہیں کر رہی ہے جو حکومت کو کرنے چاہئیں۔
چیف جسٹس کا کہنا تھا کہ عوام مشکل حالات اور مسائل کا سامنا کر رہے ہیں، آئین کے بینیفشری عوام ہیں، بطور چیف جسٹس ذمہ داری عائد ہوتی ہے کہ آئین کی عملداری کروائیں۔اس تقریب سے سابق چیف جسٹس آصف سعید کھوسہ نے بھی خطاب کیا اور کہا کہ اپنے دھڑے کے ساتھ کھڑے ہونے کی روایت سے میرٹ کا قتل ہوتا ہے۔
