کولمبو(صباح نیوز)سری لنکا میں دنیا کا سب سے بڑا نیلم کا پتھر نمائش کے لیے پیش کردیا گیا، 310 کلوگرام وزنی پتھر کو ملکہ ایشیا قرار دیا گیا ہے۔
ایک میڈیا رپورٹ کے مطابق دنیا بھر میں پائے جانے والے نیلم کے تمام پتھروں میں سے تقریبا 90 فیصد سری لنکا کے ہیں جو اپنی منفرد ساخت کی وجہ سے مشہور ہیں۔اس نیلم کو کولمبو سے 65 کلومیٹر جنوب میں ہورانا میں ایک جواہر کے مالک کے گھر نمائش کے لیے رکھا گیا تھا، قیمتی پتھر تین ماہ قبل رتنا پورہ کے ماہرین نے دریافت کیا تھا۔
رتنا پورہ کو جنوبی ایشیائی ملک کے جواہرات کے دارالحکومت کے طور پر جانا جاتا ہے، جو نیلم اور دیگر قیمتی جواہرات کا سب سے بڑا برآمد کنندہ ہے۔ہیروں کے معروف ماہر ڈاکٹر جمینی زویسا کا کہنا ہے کہ محتاط اندازوں کے مطابق یہ پتھر شاید 40 کروڑ سال پہلے بنا ہوگا۔سری لنکا نے گزشتہ سال جواہرات، ہیروں اور دیگر زیورات کی برآمد سے تقریبا نصف ارب ڈالر کا بزنس کیا تھا۔
