راجہ فاروق حیدر ایل او سی کی طرف مارچ کا اہتمام کریں،عبدالرشید ترابی


مظفر آباد:چیئرمین پبلک اکائونٹس کمیٹی آزادجموں وکشمیر اور سابق امیر جماعت اسلامی آزاد کشمیر عبدالرشید ترابی  نے وزیر اعظم آزاد کشمیر راجہ فاروق حیدر کو مشورہ دیا ہے کہ آزاد کشمیر کی تمام جماعتوں کی مشاورت سے ایل او سی کی طرف مجوزہ مارچ کا اہتمام کریں جو وزیر اعظم پاکستان کی اپیل پر ملتوی کیا گیا تھا۔

آزادجموں وکشمیر قانون ساز اسمبلی کے اجلاس کے موقع پر خطاب کرتے ہوئے عبدالرشید ترابی نے کہا کہ وزیر اعظم پاکستان بھی بھارتی حکمت عملی کے توڑ اور کشمیر کی آزادی کے لیے لائحہ عمل سے آگاہ کریں اور اس سلسلہ میں کشمیری قیادت کو اعتماد میں لیں ۔ انہوں نے کہا کہ مقبوضہ کشمیر میں بھارت کے غیر قانونی  اقدامات کے خلاف قرار دادیں پاس ہوئیں، ، کانفرنسوں کا انعقاد ہوا، ، وزیر اعظم پاکستان نے  جنرل اسمبلی سے خطاب کیا ، بین الاقوامی سطح پر ذرائع ابلاغ ، انسانی حقوق تنظیموں ، تھنک ٹینکس اور تارکین وطن کمیونٹی لیڈرز نے آواز بلند کی  مگر بدقسمتی سے مقبوضہ کشمیر میں کشمیریوں کی نسل کشی کی پالیسی جاری  ہے ۔ یہ صورت حال لمحہ فکریہ ہے ۔

عبدالرشید ترابی  نے یورپ، امریکہ اور دنیا بھر میں متحرک کشمیری رہنماؤں اور ان کی تنظیموں کو خراج تحسین پیش کیا جنہوں نے بھارت کے مکروہ چہرے کو بے نقاب کیا۔ انہوں نے کہا کہ ہم مظلوم فلسطینیوں کے ساتھ مکمل اظہار یکجہتی کرتے ہیں جو مشکلات کے باوجود غزہ میں کشمیریوں کے ساتھ اظہار یکجہتی کرتے ہیں اسی طرح آذربائیجان کے ساتھ اظہار یکجہتی کرتے ہیں جو او آئی سی میں ہمارے ساتھ کھڑا ہے۔  انہوں  نے ترکی کے صدر طیب اردگان کو خراج تحسین پیش  کیا  جنہوں نے اقوام متحدہ اور بین الاقوامی فورمز پر مسلسل کشمیریوں کی  حمایت  کااعادہ کیا ۔

مزید پڑھیں:آزادکشمیر اسمبلی میں عبدالرشید ترابی کی قرارداد، آرمینیا سے لڑائی میں آزر بائیجان کی مکمل حمایت، اظہار یکجہتی

انہوں نے  کہا کہ دیگر مسلم حکمرانوں سے بھی توقع رکھتے ہیں کہ وہ ان کے نقش قدم پر چلتے ہوئے بین الاقوامی سطح پر کشمیر کاز کی کھل کر حمایت کریں۔ سابق امیر جماعت اسلامی آزاد کشمیر عبدالرشید ترابی  نے  تجویز دی کہ ناموس رسالت کے تحفظ کے لیے او آئی سی کی سطح پر یکساں موقف اختیار کرتے ہوئے بین الاقوامی قانون سازی کا اہتمام کیا جائے۔

مغرب اظہار آزادی کا دعویدار ہونے کے باوجود ہولو کاسٹ کے خلاف بات کرنے کو جرم سمجھتا ہے تو نبی کریم ۖ کی توہین جیسے حساس مسئلے پر مسلمان کیسے خاموش رہ سکتے ہیں ۔  انہوں نے کہا کہ بین الاقوامی سطح پر قادیانی لابی، یہود کی پشت پناہی میں پاکستان کی سلامتی کے خلاف ریشہ دوانیاں کر رہی ہے اس کے تدارک کے لیے موثر حکمت عملی تشکیل دی جائے۔

عبدالرشیدترابی کی ترک سفیر احسان مصطفی یرداکل سے ملاقات،مسئلہ کشمیر سمیت اہم امور پر تبادلہ خیال

اسلام آباد: کنونیئر کل جماعتی کشمیر رابطہ کونسل چیئرمین پبلک اکائونٹس کمیٹی عبدالرشید ترابی نے ترک سفیراحسان مصطفی یرداکل سے اسلام آباد میں ملاقات کی ،اس موقع پر دونوں راہنمائوں نے مسئلہ کشمیر سمیت اہم امور پر تبادلہ خیال کیا ،عبدالرشیدترابی نے آزادکشمیر قانون ساز اسمبلی میں تمام پارٹیوںکی طرف سے طیب رجب اردگان کی طرف سے مسلسل کشمیریوں کی حمایت کرنے پر قرارداد منظور کی جس کا مسودہ پیش کیا ،ترکی کی ترقی استحکام کے خلاف سازشوں پر تشویش کااظہار کیا۔

عبدالرشید ترابی نے ترک صدر رجب طیب اردگان کا شکریہ ادا کیا کہ وہ مسلسل کشمیریوں کی ترجمانی کررہے ہیں اہل کشمیر رجب طیب اردگان کے لیے نیک خواہشات کااظہارکرتے ہیں ترکی نے ہمیشہ اپنے کشمیری بھائیوں کا ساتھ دیا زلزلے کے موقع پر بے پناہ خدمات سرانجام دیں ترکی زلزلے کے بعد بھی کشمیر میں ریلیف کا کام کررہا ہے جس پر ہم ان کا شکریہ ادا کرتے ہیں اس موقع پر ترک سفیر احسان مصطفی یرداکل نے کہاکہ کشمیراور فلسطین جیسے دیرینہ مسائل کو اقوام متحدہ کی قراردادوں کے مطابق حل کیے جائیں ،اہل ترکی کشمیری اور فلسطینی بھائیوں کے شانہ بشانہ ہیں ترکی اور پاکستان کی دوستی ہمالیہ پہاڑ سے زیادہ اونچی اور مضبوط ہے ۔