قاہرہ (صباح نیوز)کچھ عرصے سے بیمار دنیا کی طویل القامت مصری خاتون ہدی عبدالجواد کا مقامی اسپتال میں انتقال ہوگیا۔
غیر ملکی خبر رساں ادارے کے مطابق دنیا کی سب سے لمبی قد والی مصری خاتون ہدی عبدالجواد کا الشرقیہ صوبے میں انتقال ہوگیا۔ 27 سالہ طویل القامت خاتون کئی برسوں سے گردوں کے امراض میں مبتلا تھیں۔مقامی اسپتال میں ہدی عبدالجواد کا ڈائیلسس جاری تھا۔
ان کے معالجین کا کہنا تھا کہ لمبے قد والے شخصیات کو گردوں کی بیماریوں کا سامنا رہتا ہے اور اکثر طویل القامت ہونے کا ریکارڈ رکھنے والوں کا انتقال گردے خراب ہونے کی وجہ سے ہوا ہے۔
ہدی عبدالجواد کے پاس گنیز بک آف ورلڈ ریکارڈ کے تین ریکارڈز تھے، ان میں سب سے لمبے ہاتھ، بڑے پیر اور لمبے بازو شامل ہیں۔ ہاتھ کی لمبائی 24.3 سینٹی میٹر، پیر کی لمبائی33.1 سینٹی میٹر جبکہ بازو 236.3 سینٹی میٹرلمبے تھے۔
ہدی عبدالجواد کے 33 سالہ بھائی محمد عبدالجواد کے پاس بھی مردوں میں سب سے لمبے بازو اور چوڑے ہاتھ رکھنے کا ریکارڈ ہے۔ ان کے بازووں کی چوڑائی 250.3 سینٹی میٹر جبکہ ہاتھ کی چوڑائی 31.3 سینٹی میٹر ہے۔
