راولپنڈی(صباح نیوز)موٹروے ایم ٹو پر کلر کہار کے قریب مسافر بس حادثے کا شکار ہو کر الٹ گئی، جس کے نتیجے میں چھ افراد جاں بحق اور 17 افراد زخمی ہوگئے ہیں۔ زخمیوں میں سے چار کی حالت تشویشناک ہے۔حکام کے مطابق، راولپنڈی سے وہاڑی جانے والی مسافر بس جس میں 30 سے زائد مسافر سوار تھے، کلر کہار پہنچنے پر ڈرائیور کے بے قابو ہونے سے بس الٹ گئی۔
حادثے کے بعد ریسکیو 1122 اور موٹروے پولیس فوری طور پر موقع پر پہنچے اور امدادی کارروائیاں شروع کیں۔بس میں پھنسے زخمیوں کو نکال کر ابتدائی طبی امداد فراہم کی گئی اور انہیں قریبی اسپتال منتقل کر دیا گیا۔جاں بحق ہونے والے چھ مسافروں کی لاشوں کو ٹراما سینٹر کلر کہار منتقل کر دیا گیا۔
حکام کے مطابق زخمیوں میں سے چار افراد کی حالت تشویشناک ہے۔موٹروے پولیس نے تمام احتیاطی تدابیر اختیار کرتے ہوئے حادثے کے مقام کو محفوظ کر لیا ہے۔ابتدائی تحقیقات کے مطابق حادثہ ڈرائیور کی غفلت اور لاپرواہی کے باعث پیش آیا ہے، تاہم حتمی وجہ کا تعین کرنے کے لیے تحقیقات جاری ہیں
