اسلام آباد ،پشاور(صباح نیوز)وفاقی دارالحکومت اسلام آباد اور خیبر پختونخوا کے مختلف اضلاع میں زلزلے کے جھٹکے محسوس کئے گئے ۔زلزلہ پیما مرکز کے مطابق ریکٹر سکیل پر زلزلے کی شدت 5.2 ریکارڈ کی گئی، اس کا مرکز افغانستان ریجن کوہ ہندوکش میں 198 کلومیٹر زیر زمین تھا۔
زلزلے کے جھٹکے اسلام آباد اور گردونواح، پشاور سمیت خیبر پختونخوا کے مختلف علاقوں بشمول صوابی، سوات، شانگلہ، چترال، لوئردیر، ملاکنڈ، خیبر میں محسوس کئے گئے ۔علاوہ ازیں تیمرگرہ، نوشہرہ، بونیر، ایبٹ آباد، مینگورہ، کوہاٹ، سوات، مینگورہ اور گرد ونواح میں بھی زلزلے کے جھٹکے محسوس کئے گئے ، زلزلے کے شدید جھٹکوں کے باعث شہری دفاتر، گھروں اور دکانوں سے کلمہ طیبہ کا ورد کرتے باہر آگئے۔
