کراچی (صباح نیوز) الخدمت فاؤنڈیشن کراچی کے واش پروگرام کے تحت پانی کے عالمی دن پرآگہی مہم، سیمیناراور واکس کا اہتمام کیا گیاجس کا مقصد پانی کی اہمیت اور گلیشئرز کے تحفظ کے حوالے سے شعور اجاگر کرنا تھا۔الخدمت کی جانب سے ٹیپو سلطان روڈ پر واک کا اہتمام کیا گیا،جس کی قیادت ناظم جناح ٹاو ن رضوان عبدالسمیع اورڈائریکٹر الخدمت واش پروگرام گوہرالاسلام نے کی۔ اس موقع پر بانی وسی ای او بلیو نیٹ ڈاکٹر نزہت خان ،ماہر تحفظ ماحولیات طفیل علی زبیدی ،طلبہ اور الخدمت رضاکار موجود تھے ۔
اس موقع پرالخدمت کی نئی واٹر وین کی سروس کا بھی آغاز کیا گیا ۔ واک میں منیجر واش پروگرام سعد اکبر ،طلبہ و طالبات، الخدمت کے رضاکار اورذمہ داران شریک تھے ۔ اس موقع ٹان ناظم جناح ٹان رضوان عبد السمیع نے اپنے خطاب میں کہا کہ پانی زندگی ہے ،یہ ہماری اہم ترین بنیادی ضرورت ہے ۔اس کے ضیاع کو روکنا ہوگا ۔ہم اپنے گھروں میں ہوں یا دفاترمیں ہماری ذمہ داری بنتی ہے کہ اسے احتیاط سے استعمال کریں ۔
گوہرالاسلام نے کہا کہ الخدمت شہریوں کوصاف پانی کی فراہمی کے ساتھ ساتھ پانی کی اہمیت سے متعلق شعوروآگاہی بھی فراہم کر رہی ہے ۔صاف پانی کی اہمیت اور اس کے تحفظ سے متعلق زیادہ سے زیادہ شعور اجا گرکرنا ہوگا کیونکہ آلودہ پانی بھی انسانی صحت کیلئے سنگین خطرہ ہے ۔ڈاکٹر نزہت خان نے کہا کہ پانی کے ذخائرکے عدم تحفظ اور اس کی اہمیت کو نظر انداز کرنے سے دنیا بھر میں آبی بحران پیدا ہو سکتا ہے۔پانی کے بغیر انسانی وجود نا ممکن ہے۔ گلیشیئرز کی پگھلتی ہوئی برف پانی کے قدرتی وسائل کی فراہمی میں اہم کردار ادا کرتی ہے،ہمیں اس کیلئے منظم لائحہ عمل تیار کرنا ہوگا اور پانی کو محفوظ بنا نا ہوگا ۔
ماہر تحفظ ماحولیات طفیل علی زبیدی نے کا کہ ماحولیات کو خوبصورت بنانے اور اس کے تحفظ میں پانی کا بڑا کردار ہے ،ضرورت اس مر کی ہے کہ ہم پانی کو ضائع ہو نے سے روکیں ،کلیشیئرز کومحفوظ بنائیں اور اس کی اہمیت کو سمجھیں ۔ آج ہم اس پر کام کریں گے توآنے والی نسلوں پر احسان ہو گا ۔علاوہ ازیں الخدمت آرفن کیئر پروگرام کے تحت شاہ لطیف میں سیمینار اورآگہی واک کا اہتمام کیا گیا ،جس میں باہمت بچوں نے بھرپور شرکت کی ۔اس موقع پر منیجر آرفن کیئر پروگرام ہارون شاہد ودیگر ذمہ داران موجود تھے ۔
سیمینار سے خطاب میں مقررین نے کہا کہ گلیشیئرز کا پگھلنا عالمی پانی کے ذخائر پر سنگین اثرات مرتب کر رہا ہے۔ گلیشئر تحفظ کے لیے ملکی عالمی سطح پر اقدامات کی ضرورت ہے۔ انہوں نے پانی کے ذخائر کی حفاظت کے لیے اجتماعی کوششوں کی اہمیت پر زور دیا، بعد ازاں آگہی واک کا اہتمام کیا گیا۔واک میں بچوں نے بینرز اور پے کارڈز اٹھا رکھے تھے جن پر گلیشیئرز کے تحفظ اور پانی کی اہمیت اور اس کے ضیا ع کو روکنے سے متعلق نعرے درج تھے۔مقررین نے کہا کہ پانی انسان کی زندگی ہے ۔ انہوں نے کہا کہ آگہی مہم کا مقصد نہ صرف گلیشیئرز کے تحفظ کے لیے آواز بلند کر نا ہے بلکہ پانی کی اہمیت کو اجاگر کرنا ہے ۔
