لاہور(صباح نیوز) پاکستان کرکٹ بورڈ (پی سی بی)کے چیئرمین اور وفاقی وزیر داخلہ محسن نقوی نے کہا ہے کہ چیمپئنز ٹرافی 2025 کی میزبانی پاکستان ہی کرے گا، نیوزی لینڈ کیخلاف سیریز کے لیے اسکواڈ کا اعلان کل ہوگا، غیر ملکی کوچز کا فیصلہ 14 اپریل تک ہو جائے گا۔ لاہور میں میڈیا سے گفتگو کرتے ہوئے محسن نقوی نے تصدیق کی کہ متحدہ عرب امارات(یو اے ای)کے عثمان خان کے نام پر سلیکشن کے لیے غور کیا جا رہا ہے اور وہ قومی سکواڈ کا حصہ ہوں گے۔
پی سی بی چیئرمین کا یہ اعلان ایسے وقت میں سامنے آیا ہے جب عثمان خان، جنہوں نے پاکستان سپر لیگ کے نویں ایڈیشن میں اپنی جگہ بنائی تھی، پر گزشتہ ہفتے یو اے ای کرکٹ بورڈ نے معاہدے کی خلاف ورزی اور خلیج کے لیے کھیلنے کے اپنے فیصلے سے متعلق غلط بیانی پر کرکٹر پر 5 سال کی پابندی عائد کر دی تھی۔ اس کے علاوہ محسن نقوی نے کہا کہ 18 اپریل کو نیوزی لینڈ کے خلاف پانچ میچز کی ٹی ٹوئنٹی سیریز کے لیے پاکستانی اسکواڈ کا اعلان (منگل کو)کو ہوگا۔ انہوں نے یہ بھی بتایا کہ غیر ملکی کوچز کا فیصلہ 14 اپریل تک ہو جائے گا،یاد رہے کہ پاکستان کرکٹ بورڈ کے گیری کرسٹن اور جیسن گلسپی کے ساتھ کوچنگ کے معاملات طے ہوگئے تھے۔
ذرائع کے مطابق گیری کرسٹن وائٹ بال جبکہ جیسن گلسپی ریڈ بال کے ہیڈ کوچ ہوں گے تاہم اس کا ابھی تک باضابطہ اعلان نہیں کیا گیا۔ چیئرمین پی سی بی محسن نقوی نے اس بات کی بھی یقین دہانی کروائی کہ چیمپئنز ٹرافی 2025 کی میزبانی پاکستان ہی کرے گا۔ انہوں نے کہا کہ بھارتی ٹیم کا پاکستان آنے یا نہ آنے کا معاملہ قبل از وقت ہے، پاکستان میں باہر سے بھی ٹیمیں آئیں گی اور چیمپئنز ٹرافی پاکستان میں ہی ہوگی۔ یاد رہے کہ آئی سی سی چیمپئنز ٹرافی فروری 2025 میں شیڈول ہے۔ یہ بھی واضح رہے کہ پاکستان اور نیوزی لینڈ کے درمیان 5 ٹی ٹوئنٹی میچز کی سیریز 18 اپریل سے شروع ہوگی، نیوزی لینڈ کرکٹ ٹیم 12 اپریل کو پاکستان کے لیے روانہ ہوگی۔
