سنگاپور(صباح نیوز)معیشت اور شماریات کے ایک مستند اور معروف ادارے نے دنیا کے مہنگے اور سستے ترین شہروں کی فہرست جاری کردی جس میں سستے ترین شہروں میں چوتھے نمبر پر پاکستان کا ایک شہر بھی شامل ہے۔عالمی خبر رساں ادارے کے مطابق اکنامسٹ انٹیلی جنس یونٹ کی سال 2023 کی فہرست میں 173 شہروں میں سے دنیا کے مہنگے ترین شہر سنگھاپور اور زیورخ قرار پائے ہیں۔مہنگے ترین ممالک کی فہرست میں دوسرے نمبر پر نیویارک اور جنیوا مشترکہ طور پر براجمان ہیں۔
علاوہ ازیں ہانگ کانگ، لاس اینجلس، پیرس، تل ابیب، کوپن ہیگن اور سان فرانسسکو بھی مہنگے ترین شہروں میں شامل ہیں۔اس ڈیٹا کے لیے 14 اگست سے 11 ستمبر 2023 کے دوران سروے کرایا گیا تھا جس میں روز مرہ کی 200 اشیائے ضروریہ اور سروسز کا جائزہ لیا گیا جس میں 7.4 فیصد تک اضافہ ہوا تھا۔دوسری جانب اسی ڈیٹا کے تحت دنیا کے سستے ترین شہروں کی فہرست کی بات کی جائے تو شام کا دارالحکومت دمشق مسلسل چوتھی بار سستا ترین شہر قرار پایا ہے اور اس کے بعد نمبر تہران کا آتا ہے۔
لیبیا کا دارالحکومت تریپولی تیسرے، کراچی چوتھے، ازبکستان کا تاشقند پانچویں، تیونس چھٹے، لوساکا ساتویں اور بھارت کا احمد آباد آٹھویں نمبر پر ہے۔علاوہ ازیں دنیا کے سستے ترین شہروں میں نویں اور دسویں نمبر بالترتیب نائیجریا کا شہر لاگوس اور بھارتی شہر چینائی براجمان ہیں۔۔۔
