مری(صباح نیوز)مری میں برفباری کے دوران جاں بحق پولیس افسر کا آخری وائس میسج سامنے آ گیا، آخری وقت تک مدد کیلئے پکارتا رہا،تھانہ کوہسار میں تعینات اے ایس آئی فیملی کے ساتھ سیر کیلئے مری گئے تھے۔
اے ایس آئی کلڈنہ روڈ پر گاڑی میں ہی بیوی بچوں سمیت جاں بحق ہوئے۔اے ایس آئی نوید کا آخری وائس میسج سامنے آگیا ہے، جس میں مدد کیلئے پکارتے رہے وہ کہہ رہے ہیں کہ بہت زیادہ پریشان ہیں، ہم اٹھارہ گھنٹے سے پھنسے ہوئے ہیں، نوید اقبال مدد کیلئے ریسکیوآپریشن اور کرین بھجوانے کیلئے رابطے کرتے رہے۔
اپنے ساتھی کو کہتے رہے کہ پتا کر کے بتاو کرین آئی ہے کہ نہیں۔ مزید کتنے گھنٹے انتظار کرنا ہوگا۔اے ایس آئی اپنے ساتھی کو پیغام میں کہہ رہے ہیں کہ کرین کام شروع کر دے تو ہمیں بھی کوئی امید ہو گی۔ ہمارے پاس ابھی تک برفباری ہو رہی ہے ہم بہت پریشان ہیں،خیال رہے شدید برفباری کے باعث مری میں پیش آنے سانحے میں اے ایس آئی نوید اقبال خاندان سمیت جاں بحق ہوگئے ، ا ے یس آئی نویداقبال اپنے بچوں، ہمشیرہ اور بھانجوں کے ہمراہ سفرکر رہے تھے۔
جاں بحق افراد میں اے ایس آئی نویداقبال اور ان کی ہمشیرہ ، 18سالہ بیٹی شفق، 14سالہ دعا،10سالہ اقرا،5سالہ احمد ، 2سالہ بھانجا اور 9سالہ بھتیجا شامل ہیں۔
