کرک،لاہور(صباح نیوز)خوشحال خان خٹک یونیورسٹی کرک کے اسسٹنٹ پروفیسر اور کنٹرولر امتحانات ڈاکٹر محمد زبیرکو انسانیت کیلئے غیر معمولی خدمات اور اپنے فرائض منصبی کی بہترین کارکردگی کا مظاہرہ کرنے پر باوقار قائداعظم گولڈ میڈل سے نوازا گیا۔
ایوارڈ دینے کی تقریب ای لائبریری آڈیٹوریم سپورٹس کمپلیکس قذافی سٹیڈیم لاہور میں ہوئی۔قائداعظم گولڈ میڈل ایک قومی سطح کا ایوارڈ ہے جو بانی پاکستان قائداعظم محمد علی جناح کی قدروں اور اصولوں کو مد نظررکھتے ہوئے اپنے متعلقہ شعبوں میں نمایاں خدمات انجام دینے والے افراد کو دیا جاتا ہے۔ ڈاکٹر محمد زبیر کی شاندار کامیابیوں اور اپنے پیشے سے غیر متزلزل وابستگی نے انہیں اس باوقار میڈل کا حقدار قرار دیا۔تعلیم کے لیے ولولے اور اس کے وقار کے لیے انتھک محنت کے ساتھ ساتھ، ڈاکٹر محمد زبیر طلبہ کے لیے ایک رول ماڈل کے طور پر ابھرے ہیں۔
کنٹرولر امتحانات کی فرائض کی انجام دہی کیلئے ان کی لگن نے خوشحال خان خٹک یونیورسٹی، کرک کی ترقی اور کامیابی میں نمایاں کردار ادا کیا ہے۔تعلیم کو فروغ دینے میں ڈاکٹر زبیر کی انتھک کوششوں کو، خاص طور پر پسماندہ کمیونٹیز میں، بڑے پیمانے پر تسلیم کیا گیا ہے۔ ڈاکٹر محمد زبیر نے تعلیمی میدان میں اپنی شاندار خدمات کے علاوہ انسانی ہمدردی کے مختلف اقدامات میں لگن سے حصہ لیا ہے۔ ان کی فلاحی سرگرمیوں نے بے شمار افراد کی زندگیوں کو سنوارا ہے،
خاص طور پر وہ لوگ جو سماجی و اقتصادی چیلنجوں کا سامنا کر رہے ہیں۔یونیورسٹی کے وائس چانسلر پروفیسر ڈاکٹر سردار خان، رجسٹرار محمد رشاد خٹک، ٹریژرر حافظ اسماعیل خان، تمام ایچ او ڈیز، سیکشنز کے سربراہان، فیکلٹی، انتظامی افسران اور سٹاف نے ڈاکٹر محمد زبیر کو قائد اعظم گولڈ میڈل ملنے پر دلی مبارکباد دی ہے۔
