اسلام آباد(صباح نیوز) سابق وزیر اعظم شاہد خاقان عباسی نے کہا ہے کہ دھاندلی کے باوجود پی ٹی آئی کو خیبرپختونخوا میں شکست ہوئی۔ایل این جی ریفرنس کی احتساب عدالت میں سماعت کے موقع پر میڈیا سے بات کرتے ہوئے انہوں نے کہا کہ چیئرمین نیب بتائیں کتنے سیاستدانوں کو سزا ہوئی، کتنوں سے ریکوری ہوئی، چینی اور گندم پر ڈاکا کس نے ڈالا ہے۔
چیئرمین نیب بتائیں آپ کو کس نے سیاستدانوں کو بدنام کرنے کا اختیار دیا تھا۔ انہوں نے کہا کہ کیمرے لگائیں اور بتائیں عدالتوں اور منسٹری میں کیا ہوتا ہے، ایک 22 گریڈ سے افسر سے کہا گیا کہ جھوٹے بیانات دو۔انہوں نے کہا کہ ہم پوچھیں گے ایل این جی اور فرنس آئل پر ڈاکا کس نے ڈالا، کابینہ میں بیٹھے ڈاکو کہاں سے آئے تھے کون لایا تھا۔
انہوں نے کہا کہ حکومت چاہتی ہے یہی چیئرمین نیب رہے اور ان کے تابع ہو۔انہوں نے سوال کیا کہ مہنگائی کیوں ہے، عوام پس کیوں رہے ہیں، حکومتی اہلکاروں کے بیانات آپس میں نہیں ملتے، ملک میں نہ بجلی ہے اور نہ گیس ہے، پس عوام رہے ہیں۔خیبر پختو نخوا کے بلدیاتی الیکشن کے حوالے سے بات کرتے ہوئے انہوں نے کہا کہ کے پی میں حکومت اور پولیس تھی، انتخابات میں دو دن پہلے دھاندلی شروع ہوگئی تھی،دھاندلی کے باوجود پھر بھی عوام نے انہیں شکست دی۔اس سے قبل ایل این جی ریفرنس میں سماعت کے موقع پر احتساب عدالت نے ن لیگی رہنما کو حاضری کے بعد جانے کی اجازت دیدی۔جج احتساب عدالت نے سماعت میں ریمارکس دیتے ہوئے کہاکہ ساتویں نیب گواہ پر وکلا جرح کریں۔
