جماعت اسلامی جمعتہ المبارک کو گستاخانہ خاکوں کے خلاف ریاست گیر احتجاج کرے گی ڈاکٹر خالد محمود خان


راولاکوٹ: جماعت اسلامی آزادجموں وکشمیر کے امیر ڈاکٹر خالد محمود خان نے اعلان کیا ہے کہ جماعت اسلامی جمعتہ المبارک کو فرانس میں گستاخانہ خاکوں کے خلاف ریاست گیر احتجاج کرے گی .

اپنے بیان میں انہوں نے کہاکہ قوم تحفظ ناموس رسالت ۖ کے لیے نکلے ،علماء کرام اپنے جمعہ کے خطبات میں شان رسالت ۖ کے حوالے سے بات کریں ،12ربیع الاول کا پیغام بھی یہی ہے کہ ہم اتباع رسول ۖکریں ،فرانس کے اقدامات کے خلاف او آئی سی کے رکن ممالک آواز بلندکریں ،پوری ملت اسلامیہ یک جان اور یک زبان ہو کر ناموس رسالت ۖ کا تحفظ کرے ،

ان کا کہنا تھا کہ جماعت اسلامی تمام ضلعی ہیڈ کوارٹرز پر بعد از جمعہ احتجاجی مظاہرے کرے گی ،انہو ں نے کہاکہ تمام اسلامی ممالک فرانس کا سیاسی،سفارتی اور معاشی بائیکاٹ کریں تحفظ ناموس رسالت ۖ ہمارے ایمان کا حصہ ہے نبی مہربان ۖ پوری انسانیت کی ہدایت کے لیے مبعوث کیے گئے قیامت تک آنے والی انسانیت کے لیے نبی ۖ رشدوہدایت کا سرچشمہ ہیں ،اللہ تعالیٰ نے پوری انسانیت کی ہدایت کے لیے نبی پاک ۖ کو معبوث فرمایا نبی ۖ کی تعلیمات انسانیت کو فلاح کی طرف لے جانے والی ہے ۔

ڈاکٹر خالد کا کہنا تھا کہ مسلمان نبی ۖ کی شان میں گستاخی کو برداشت نہیں کرسکتے انہوں نے کہاکہ سوا ارب مسلمان اور 57اسلامی ممالک بڑی طاقت ہیں وہ اپنی طاقت کا اظہار کریں تا کہ آئندہ کسی بھی ملک کے سربراہ اور فرد کو یہ جرات نہ ہوکہ وہ ناموس رسالت ۖ پر حملہ کرے ہماری کمزوری سے فائدہ اٹھا کر دشمن حملہ آور ہیں پوری ملت اسلامیہ اتحاد اور اتفاق کا مظاہرہ کرے تو وہ اپنا مقام بحال کرسکتی ہے ۔