کوروناوائرس ،بلوچستان میں 11تعلیمی ادار ے بند


کوئٹہ:بلوچستان کے مختلف علاقوں میں کوروناوائرس پھر سراٹھانے لگا ،یونیورسٹی سمیت 11تعلیمی اداروں کو بند کر دیا گیا۔جن علاقوں میں تعلیمی ادارے بند کئے گئے ان میں کوئٹہ ،گوادر، ژوب اور ڈیرہ بگٹی شامل ہیں۔

بند کیئے گئے تعلیمی اداروں میں لڑکوں اور لڑکیوں کے تعلیمی ادارے شامل ہیں ۔صوبہ کی واحد خواتین یونیورسٹی ، بہادر خان وویمن یونیورسٹی کو بھی تاحکم ثانی بند کر دیا گیا ہے۔ یونیورسٹی انتظامیہ نے نجی ٹی وی کو بتایا کہ یونیورسٹی میں کوروناوائرس کا کوئی کیس تو رپورٹ نہیں ہوا تاہم صوبہ بھرسے یونیورسٹی کے ہوسٹلز میں طلباء اور اساتذہ کی بڑی تعداد آتی ہے اس صورتحال کو مد نظر رکھتے ہوئے یونیورسٹی کو بند کیا گیا ۔

مزید پڑھیں: ملک میں بھر میں کورونا کیسز کی تازہ صورتحال

جبکہ محکمہ صحت بلوچستان کی جانب سے شہروں کے اسکولوں میں غیر متعلقہ افراد کے داخلہ پر پابندی عائد کر دی گئی ہے اور محکمہ صحت کی جانب سے کوروناوائرس کے ٹیسٹ بھی کیئے جارہے ہیں۔ جبکہ محکمہ صحت کے مطابق اسکولوں اور دیگر تعلیمی اداروں میں سرکاری سطح پر ماسک،سینی ٹائزر اور دیگر اشیاء پہنچا دی گئی تھیں۔ صوبہ میں 15ستمبر کو نویں جماعت سے لے کر یونیورسٹی کی سطح تک تعلیمی ادارے کھولے گئے تھے۔