لاہور(صباح نیوز) پنجاب یونیورسٹی نے سندھ کے طلبہ کے داخلے منسوخ کردیئے۔جامعہ پنجاب کے رجسٹرار کی جانب سے تمام ڈینز، کالجوں کے پرنسپلز، ڈائریکٹرز اور چیئرمینز کو خط لکھا گیا ہے، جس میں کہا گیا ہے کہ جامعہ پنجاب نے سندھ کے طلبہ کو دیئے گئے داخلے منسوخ کردیئے ۔
خط کے متن کے مطابق جامعہ پنجاب میں داخلوں کی حتمی تاریخ 8 نومبر تھی، سندھ کے انٹر کے نتائج جاری نہیں ہوسکے، جس کی وجہ سے اب طلبہ کے داخلے منسوخ کئے گئے ہیں۔دوسری جانب ترجمان وزیر جامعات بورڈز سندھ اسماعیل راہو نے کہا ہے کہ سندھ حکومت نے وفاقی حکومت اور پنجاب یونیورسٹی کو خط لکھا ہے، جس میں کہا ہے کہ سندھ کے طلبہ کا مستقبل دائوپر ہے، جس میں طلبہ کا کوئی قصور نہیں۔
انہوں نے مزید کہا کہ پنجاب میں سندھ کے طلبہ کے عارضی داخلے معطل کرنا ناانصافی ہے، سب جانتے ہیں کہ کورونا کی وجہ سے سب سے زیادہ تعلیمی عمل متاثر ہوا۔انہوں نے کہا کہ انٹرمیڈیٹ کے امتحانات ہر سال اپریل میں ہوتے ہیں جبکہ کورونا کے باعث جولائی میں ہوئے، وبا کی وجہ سے پرچوں کا شیڈول ستمبر تک جاری رہا ہے۔
