اسلام آباد(صباح نیوز) چیئرمین پیپلز پارٹی اوروزیرِ خارجہ بلاول بھٹو زرداری نے سانحہ کارساز کے موقع پر اہم پیغام جاری کردیا ہے۔
بلاول بھٹو زرداری نے سانحہ کارساز کی 15 ویں برسی کے موقع پر پیغام دیتے ہوئے کہا کہ جمہوریت کی بحالی اور مضبوط بنانے کی جدوجہد میں پیپلز پارٹی کی قیادت اور کارکنان کا کردار اہم ہے۔
انہوں نے کہا کہ 18 اکتوبر 2007 کو شہید محترمہ بینظیر بھٹو کے تاریخی استقبال کے لیے کراچی میں 30 لاکھ سے زائد عوام کے مجمع کو سبوتاژ کرنے کے لیے 180 جیالوں کا خون بہایا گیا۔
چیئرمین بلاول بھٹو زرداری کا کہنا تھا کہ ہمیں ہر سال 18 اکتوبر کو اپنے شہدا کو یاد کرنے اور ان کے اہل خانہ کے غم میں شریک ہونے کے ساتھ ساتھ اپنی نوجوان نسل کو اپنی تاریخ اور ان سے پہلے والی نسلوں کی جدوجہد و قربانیوں سے آگاہ کرنا چاہئیے۔
انہوں نے کہا کہ ہمیں نوجوان نسل کو سکھانا ہے کہ ذاتیات پر اترنا سیاست نہیں، جھوٹ بولنے کے ریکارڈ توڑنا جدوجہد نہیں ہوتی۔
ان کا کہنا تھا کہ پیپلز پارٹی ملک میں جمہوریت کو مضبوط بنانے کی جدوجہد کو آگے بڑھاتی رہے گی کیونکہ سانحہ کارساز کے شہدا کی قربانی اور ان کے اہل خانہ کی آنکھوں سے گرنے والے آنسووں کا ازالہ صرف مضبوط جمہوریت کے قیام میں پنہاں ہے۔
