ہمیں اپنے اسلاف کے مشن اور نظریات کو زندہ رکھنا ہے، مولانا فضل الرحمان


اسلام آباد(صباح نیوز)جمعیت علما اسلام(ف) کے سربراہ مولانا فضل الرحمان نے کہا ہے کہ ہمارے آئین کا بنیادی ڈھانچہ ،آئین کا اساس اسلام ہے، دوسرا اساس جمہوریت، تیسرا اساس کہ نظام پارلیمانی ہوگا اور چوتھا اساس کہ ایک وفاق اور چار اکائیاں ہونگی ، ان بنیادوں پر ہمارا ملک کھڑا ہے ، پاکستان کا یہ آئین متفقہ ہے ۔

ان خیالات کا اظہار انہوں نے مفتی محمود کانفرنس سے خطاب کرتے ہوئے کیا۔ انہوں نے کہا کہ وزیراعظم محمد شہباز شریف اور دیگر قائدین کو کانفرنس میں خوش آمدید کہتا ہوں ، اپنے اسلاف کے مشن اور نظریات کو زندہ رکھنا ہے اور دنیا کو بتانا ہے کہ ہماری نظر میں آفاقیت ہے ۔انہوں نے کہا کہ ہمارے اکابر ین نے برصغیر کی تمام اقوام اور مذاہب کو ایک پلیٹ فارم پر جمع کیا ، مفتی محمود دوران طالب علمی میں بھی جیل گئے ۔

انہوں نے کہا کہ مفتی محمود ایک نظریہ تھا اور ہر حلقہ فکر میں معتبر تھے ، مسلم لیگ اور اے این پی کے حلقوں میں ان کا احترام تھا ۔مولانا فضل الرحمان نے کہا کہ قرار داد مقاصد متفقہ دستور ہے جو علامہ شبیر عثمانی نے پیش کی ۔ انہوں نے کہا کہ پاکستان کا یہ آئین متفقہ ہے ۔ کانفرنس سے وزیراعظم محمد شہباز شریف اور جمیعت علما اسلام (ف) کے دیگرقائدین نے بھی خطاب کیا ۔۔