سکھر (صباح نیوز ) پاکستان پیپلزپارٹی کے سینئر رہنما خورشید شاہ نے کہا ہے کہ کینالز کی تعمیر کے حوالے سے ہمارا موقف واضح ہے اور کینالز کی تعمیر پر سندھ سے ہی نہیں پنجاب سے بھی آواز اٹھ رہی ہے۔ عظمی بخاری بیان دینے سے قبل پانی کی تقسیم کا 91ء کا معاہدہ پڑھ لیں۔
سکھر میں میڈیا سے گفتگو کے دوران پاکستان پیپلزپارٹی کے مرکزی رہنما نے وزیر اطلاعات پنجاب کے بیان پر ردعمل دیتے ہوئے کہا کہ عظمی بخاری بیان دینے سے قبل پانی کی تقسیم کا 91 کا معاہدہ پڑھ لیں جبکہ بنیادی طور پر عظمی کا تعلق پیپلزپارٹی سے رہا ہے لہذا وہ ایسے بیانات نہ دیں۔ ان کا کہنا تھا کہ پانی کی تقسیم کے حوالے سے 91ء کا معاہدہ کلیئر ہے اور کینالز کی تعمیر کے حوالے سے ہمارا موقف واضح ہے، کینالز کی تعمیر پر اب صرف سندھ سے ہی نہیں پنجاب سے بھی آواز اٹھ رہی ہے۔
انہوں نے کہا کہ جب 91ء کا معاہدہ ہوا تو ہمارے پاس 114 ملین ایکڑ فٹ پانی تھا، اس وقت ہمارے پاس صرف 94ملین ایکڑ پانی ہے۔ خورشید شاہ نے کہا کہ پانی کا مسئلہ اہم ہے، ہم چاہتے ہیں ہر پاکستانی کو پانی ملے، جس طرح آبادی بڑھ رہی ہے آگے چل کر ہمیں پینے کے لیے بھی پانی ملے گا یا نہیں۔ ایک سوال کے جواب میں ان کا کہنا تھا کہ پی ٹی آئی والے بے شک کوئی بھی قرارداد لائیں مگر خاموش تو ہوجائیں، پارلیمنٹ میں وہ کسی کی بات سنتے نہیں وہ کسی بات پر سنجیدہ نہیں ہیں۔
خورشید شاہ نے کہا کہ ہمیں سوچنا ہوگا کہ ہمیں پاکستان کی بات کرنی ہوگی یا مسائل پیدا کرنا ہوں گے جبکہ بانی پی ٹی آئی کی رہائی کے حوالے سے کوئی پیشگوئی نہیں کرسکتا یہ عدالتی معاملہ ہے۔ واضح رہے کہ گزشتہ روز لاہور میں پریس کانفرنس کرتے ہوئے عظمی بخاری نے کہا تھاکہ بلاول بھٹو زرداری کی باتوں کا جواب نہیں دینا چاہتی، کینال منصوبے کا حل جلسوں یا میڈیا پر بیان بازی سے نہیں نکل سکتا۔ ان کا کہنا تھا کہ چولستان کینالز کے منصوبے پر سندھ میں صرف سیاست کی جا رہی ہے، منصوبہ صدرِ پاکستان سے باقاعدہ طور پر منظور شدہ ہے اور اس پر ان کے دستخط موجود ہیں۔
