اسلام آباد(صباح نیوز)وزیراعظم محمد شہبازشریف جمہوریہ بیلاروس کے صدر الیگزینڈر لوکاشینکو کی دعوت پر جمہوریہ بیلاروس کے 2روزہ سرکاری دورے پر روانہ ہو گئے ۔ یہ دورہ نومبر 2024 میں صدر لوکاشینکو کے پاکستان کے اہم دورے کے بعد دونوں ممالک کے تعلقات میں ایک اہم سنگ میل ہے۔ اپنے قیام کے دوران وزیراعظم باہمی دلچسپی کے شعبوں میں پیش رفت کا جائزہ لینے کے لیے صدر لوکاشینکو سے ملاقات کریں گے۔ اس حوالے سے دونوں ممالک کے درمیان پچھلے چھ مہینوں کے دوران، اعلی سطح کے دوطرفہ تبادلوں کا ایک سلسلہ جاری رہے ہے جس میں فروری 2025 میں مشترکہ وزارتی کمیشن کا 8 واں اجلاس اور اپریل 2025 میں پاکستان سے ایک اعلی سطح مخلوط وزارتی وفد کا بیلاروس کا دورہ شامل ہیں ۔ اس دورے کے دوران دونوں ممالک کے درمیان تعاون کو مزید مضبوط بنانے کے لیے متعدد معاہدوں اور مفاہمتی یادداشتوں کا تبادلہ بھی ہو گا۔ وزیراعظم کا دورہ پاکستان اور بیلاروس کے درمیان مضبوط اور جاری شراکت داری کو اجاگر کرتا ہے۔
وزیراعظم شہبازشریف بیلاروس کے دوروزہ دورے پر روانہ
