لاہور(صباح نیوز)وزیراعلیٰ پنجاب مریم نواز نے کہا ہے کہ کھیل معاشرے میں امن اور ترقی کی راہ ہموار کرتے ہیں، پنجاب میں کھیلوں کے فروغ کے لیے کھیلتا پنجاب پروگرام شروع کیاہے ۔مریم نواز نے کھیلوں کے عالمی دن کے موقع پر اپنے پیغام میں کہا کہ کھیلوں کا عالمی دن منانے کا مقصد دنیا میں امن کا فروغ ہے، کھیل معاشرے میں امن اور ترقی کی راہ ہموار کرتے ہیں، امن اور کھیل لازم و ملزوم ہیں، امن ہوگا تو کھیل بھی ہوں گے۔
وزیراعلیٰ پنجاب نے کہا کہ پنجاب میں کھیلوں کے فروغ کے لیے کھیلتا پنجاب پروگرام شروع کیا، پنجاب میں پنک گیمز امن اور مساوی ترقی کا استعارہ ہیں، حکومت کھیلوں کے فروغ کے لئے گراؤنڈز اور جمنیزیم بنا رہی ہے۔انہوں نے کہا کہ پنجاب میں 300 گراؤنڈز اور اسپورٹس کمپلیکس بنانے کے لئے اقدامات کر رہے ہیں، نوجوانوں، معمر افراد، معذور افراد اور دیگر پسماندہ علاقوں کے ہر نوجوان کو سپورٹس کے مساوی مواقع مہیا کئے جا رہے ہیں، کھیل کیلئے تمام ممکنہ وسائل مہیا کئے جائیں گے اور سپورٹس انڈوومنٹ فنڈز کو مزید بڑھائیں گے۔
