اسلام آباد(صباح نیوز)وزیراعظم محمد شہباز شریف سے ہنگو سے تعلق رکھنے والے فٹ بال کے کھلاڑی محمد ریاض نے ملاقات کی، وزیراعظم نے ریاض حسین کے ہمت و حوصلے کی پزیرائی کی، 25 لاکھ روپے کی مالی معاونت کی ،اس موقع پر وزیراعظم نے کہا کہ پاکستانی نوجوان افرادی قوت ملک کا قیمتی اثاثہ ہیں پاکستانی کھلاڑیوں کو ہر قسم کی سہولیات اور انکو بین الاقوامی سطح پر مسابقت کیلئے وسائل کی فراہمی حکومت کی اولین ترجیحات میں شامل ہے.
وزیرِ اعظم نے کہا کہ آپ قوم کے ہونہار کھلاڑی ہیں اور آپ کا ٹیلنٹ ضائع نہیں ہونے دینگے، وزیراعظم نے محمد ریاض سے گفتگو میں انہیں کھیل جاری رکھنے اور پاکستان میں فٹبال کے فروغ کے لیے فعال کردار ادا کرنے کی تلقین کی ،وزیراعظم نے ہدایت کی محمد ریاض کو انکی پسند کے وفاقی ادارے میں ملازمت دی جائے، وزیراعظم نے محمد ریاض کو 25 لاکھ روپے کا چیک پیش کیا، وزیراعظم نے ہدایت کی کہ ملک کے مایہ ناز کھلاڑیوں کو ان کی صلاحیتوں کے مطابق سرکاری اداروں میں ملازمتیں دی جائیں،
وزیراعظم نے کہاکہ ملک میں کھیلوں کے فروغ کے لیے اقدامات تیز کیے جائیں، وزیراعظم نے کہاکہ بین الاقوامی سطح پر پاکستان کی نمائندگی کرنے والے کھلاڑیوں کی بہبود اور انہیں روزگار کے پائیدار مواقع فراہم کرنے کے لیے حکمت عملی تشکیل کی جائے، وزیراعظم نے کہا کہ نوجوان کھیلوں اور دیگر صحت مند سرگرمیوں میں بڑھ چڑھ کر حصہ لیں، محمد ریاض نے وزیراعظم کی جانب سے مالی تعاون پر ان کا شکریہ ادا کیا.محمد ریاض نے کھلاڑیوں کے فلاح و بہبود اور کھیلوں کی ترویج کیلئے اقدامات پر وزیراعظم شہباز شریف کا شکریہ ادا کیا.ملاقات میں وفاقی وزرا عطااللہ تارڑ، شزہ فاطمہ خواجہ، مشیر وزیر اعظم رانا ثنا اللہ، چیئرمین وزیرِ اعظم یوتھ پروگرام رانا مشہود احمد خان اور میڈیا کوارڈینیٹر بدر شہباز وڑائچ بھی موجود تھے
