لاہور (صباح نیوز)وزیراعظم محمد شہباز شریف نے ورکنگ وومن کے ملک کی ترقی اور خوشحالی میں کردار کو سراہتے ہوئے اس عزم کا اعادہ کیاہے کہ پاکستان میں خواتین کو ملک کی ترقی میں بہترین کارکردگی اور کردار ادا کرنے کے مساوی مواقع فراہم کئے جائیں گے۔
وزیر اعظم آفس کے میڈیا ونگ سے جاری پریس ریلیز کے مطابق ورکنگ ویمن کے قومی دن کے موقع پر پیغام میں وزیر اعظم نے کہا کہ ورکنگ ویمن کے قومی دن پر ہم اپنے معاشرے کی تعمیر اور ملک کی معاشی ترقی کو آگے بڑھانے میں پاکستان کی خواتین کے اہم کردار اور شراکت کو خراج تحسین پیش کرتے ہیں۔خواتین ہماری آبادی کا نصف سے زیادہ ہیں اور ہمارے ملک کے مستقبل کی تشکیل میں کلیدی کردار ادا کرتی ہیں، جیسا کہ ہماری قوم کے بانی قائد اعظم محمد علی جناح نے بجا طور پر فرمایا تھا کہ کوئی قوم اس وقت تک عظمت کی بلندی پر نہیں پہنچ سکتی جب تک کہ تمہاری عورتیں تمہارے شانہ بشانہ نہ ہوں،آج ہم اس عزم کا اعادہ کرتے ہیں کہ پاکستان میں خواتین کو ملک کی ترقی میں بہترین کارکردگی اور کردار ادا کرنے کے مساوی مواقع فراہم کئے جائیں گے۔
وزیراعظم نے کہا کہ خواتین تعلیم اور صحت کی دیکھ بھال سے لے کر کاروبار اور عوامی خدمت تک مختلف شعبوں میں قائدانہ عہدوں پر نمایاں خدمات انجام دے رہی ہیں۔خواتین کی خدمات پیشہ ورانہ میدان کے علاوہ خاندانوں کی پرورش اور آنے والی نسلوں کو پروان چڑھانے کے حوالے سے ناگزیر ہیں۔
وزیراعظم شہباز شریف نے کہا کہ خواتین کے اہم کردار کو تسلیم کرتے ہوئے، حکومت نے کام کرنے والی خواتین کی مدد کے لیے کئی اقدامات کیے ہیں، جن میں خواتین میں کاروباری صلاحیت کو فروغ دینے کے لیے نوجوانوں کو بلاسود قرضوں کی فراہمی، خواتین کی تعلیم اور کھیلوں کی ترقی کے لیے انڈومنٹ فنڈ کا قیام شامل ہیں،خواتین کی دوہری ذمہ داریوں میں ان کو مدد فراہم کرنے کے لیے اداروں میں ڈے کیئر مراکز کا قیام بھی ہر ادارے کے لئے لازم قرار دیا گیا ہے۔
وزیراعظم نے کہا کہ ہم نے خواتین کی مہارت اور قابلیت کو بڑھانے کے لیے خصوصی تربیتی پروگرام بھی شروع کیے ہیں، تاکہ ان کو بااختیار بنایا جا سکے اور وہ سرکاری اور نجی اداروں میں اعلی عہدوں تک پہنچ سکیں۔وزیراعظم نے کہا کہ ہماری حکومت ایک ایسے مستقبل کے لئے کام کر رہی ہے جہاں خواتین کے لیے اعلی عہدوں تک پہنچنا معمول ہو۔وزیر اعظم نے کہا کہ آئیے ہم کام کرنے والی خواتین کو درپیش چیلنجوں کو کم کرنے اور خواتین کے لیے کام کا ایسا ماحول فراہم کرنے کا عہد کریں جہاں وہ ترقی کر سکیں، ان کی صلاحیتوں کو بروئے کار لا کر ہم اس بات کو یقینی بنا سکتے ہیں کہ خواتین پاکستان کی ترقی اور خوشحالی میں اہم کردار ادا کرتی رہیں گی۔
