لاہور(صباح نیوز)پاکستان مسلم لیگ ن کے رہنما سعد رفیق نے کہا ہے کہ پی ٹی آئی شوق سے فوجی قیادت سے بات کرے مگر پہلے سول سپرمیسی کے ڈرامے سے باہر تو آئے، بانی پی ٹی آئی کا وتیرہ ہے کہ ان کا ایک ہاتھ گریبان پر اور دوسرا پیروں پر ہوتا ہے۔
لاہور میں تقریب کے بعد میڈیا سے گفتگو میں سعد رفیق نے کہا کہ اگر علی امین گنڈا پور نے وفاق پر قبضہ کرنے کی کوشش کی تو پھر گورنر راج لگانے کا آپشن موجود ہے، بہتر ہے وہ یہ حماقت نہ ہی کریں۔انہوں نے کہا کہ بانی پی ٹی آئی کا وتیرہ ہے کہ ان کا ایک ہاتھ گریبان پر اور دوسرا پیروں پر ہوتا ہے، ملک میں سنجیدگی کی سیاست آنی چاہیے۔ انہوں نے کہا کہ پاکستان کو پرامن محفوظ اور مستحکم بنائیں گے، ملک مشکل حالات سے گزر رہا ہے، معاشی مسائل کے حل کیلئے محنت کر رہے ہیں۔
انھوں نے کہا کہ سعودی عرب میں بڑی سرمایہ کاری کیلئے وزیراعظم کوشش کررہے ہیں، ہمیں قرض کے بجائے سرمایہ کاری چاہیے۔ان کا کہنا تھا کہ معاشی بگاڑ بہت بڑا ہے لیکن مایوس نہیں ہوں گے، جینا مرنا پاکستان میں ہی ہے۔سعد رفیق نے کہا کہ نئی نسل کو مستحکم پاکستان دینا ہے، جھوٹ بولے جاتے ہیں زہریلا پروپیگنڈہ کیاجاتا ہے لیکن پاکستان کا قافلہ کامیابی سے دوچار ہوگا۔
