کراچی ( صباح نیوز) کونسل آف پاکستا ن نیوز پیپر ایڈیٹرز (سی پی این ای) نے روزنامہ آزادی کوئٹہ کے نیوز ایڈیٹرگلزار بلوچ اور ان کے بھائی شعیب امان ایڈوکیٹ پر نامعلوم مسلح افراد کے حملے کی مذمت کرتے ہوئے اس واقعے کو آزادی صحافت پر حملہ قرار دیا ہے۔ سی پی این ای کے صد ر ارشاد عارف، سیکریٹری جنرل اعجاز اور دیگر عہدیداران نے ایک مشترکہ بیان میں کہا کہ روزنامہ آزادی کوئٹہ کے نیوز ایڈیٹر گلزار بلوچ اور ان کے بھائی کے ساتھ مچھ کے علاقے میں پیش آنے والا واقعہ شدید مذمت کے قابل ہے۔انہوں نے حکومت سے مطالبہ کیا کہ نان اسٹیٹ ایکٹرز کے حملوں سے صحافیوں اور میڈیا پرسنز کو تحفظ فراہم کرنا ریاست کی آئینی ذمہ داری ہے لہذا اس واقعہ میں ملوث ملزمان کو فوری طور پر گرفتار کرکے انصاف کے کٹہرے میں لایا جائے۔
