اسلا م آباد(صباح نیوز)پنجاب اور بلوچستان میں آسمانی بجلی گرنے کے واقعات میں جاں بحق افراد کی تعداد 24 ہوگئی۔جنوبی پنجاب اور بلوچستان میں گرج چمک کے ساتھ بارشیں ہوئی اور اس دوران آسمانی بجلی گرنے سے 24 افراد جان سے گئے۔شدید بارشوں کے دوران آسمانی بجلی سے جنوبی پنجاب میں 16 اور بلوچستان کے مختلف علاقوں میں 8 اموات ہوئی ہیں۔رحیم یار خان میں 7 جبکہ بہاولنگر، بہاولپور اور لودھراں میں آسمانی بجلی سے تین، تین ہلاکتیں ہوئیں۔ریسکیو کے مطابق رحیم یارخان کے گردو نواح کے علاقوں میں تین مقامات پر آسمانی بجلی گرنے سے دو بچوں اور میاں بیوی سمیت 7 افراد جاں بحق ہوئے۔
میاں بیوی گندم کی کٹائی کر رہے تھے اور بچے کھیل رہے تھیکہ آسمانی بجلی کی زد میں آگئے۔ ادھربہاولپور میں آسمانی بجلی گرنے سے 3 افراد جاں بحق ہوئے جن میں ایک خاتون اور 8 سالہ بچہ بھی شامل ہے۔لودھراں میں بھی آسمانی بجلی گرنے سے خاتون سمیت 3 افراد جاں بحق ہوئے۔بہاولنگر کے علاقے فقیرالی کے قریب آسمانی بجلی گرنے سے ایک ہی خاندان کے 3 افراد جاں بحق اور 2 زخمی ہوگئے۔ریسکیو حکام کے مطابق آسمانی بجلی موٹرسائیکل سوار خاندان پر گری۔ جاں بحق افراد میں باپ اور دو بیٹے شامل ہیں، ماں بیٹا زخمی ہوئے ہیں۔ادھر بلوچستان کے مختلف علاقوں میں گزشتہ 24 گھنٹوں کے دوران 8 اموات ہوئی ہیں جب کہ 6 افراد زخمی ہوئے ہیں۔چمن اور سوراب میں آسمانی بجلی سے دو ، دو ہلاکتیں ہوئیں جب کہ قلعہ عبداللہ، مسلم باغ، پشین اور ڈیرہ بگٹی میں آسمانی بجلی سے ایک ایک ہلاکت ہوئی۔
صوبے میں موسلادھار بارش اور ژالہ باری کا سلسلہ جاری ہے، ٹوبہ اچکزئی میں گاڑی اور ٹریکٹر ٹرالی پہاڑی ریلوں میں بہہ گئی جس سے ڈرائیور زخمی ہوگیا۔ ندی نالوں میں طغیانی ہے۔چمن میں تیسرے روز بھی بجلی کی سپلائی معطل ہے، اولے پڑنے سے سیب، چیری، بادام اور خوبانی کے باغات کو نقصان پہنچا ہے۔ادھر ترجمان بلوچستان حکومت کے مطابق صوبے میں غیر معمولی بارشوں اور موسمی صورتحال کے پیش نظر تمام کمشنرز اور ڈپٹی کمشنرز کو ہدایت جاری کردی گئی ہیں۔ڈسٹرکٹ ڈیزاسٹر مینجمنٹ اتھارٹیز کو الرٹ کردیا گیا ہے جب کہ وزیراعلی نے نکاسی آب کے تمام قدرتی راستوں سے تجاوزات ہٹانے کے لییکارروائی کا حکم دے دیا ہے
آسمانی بجلی گرنے سے 2بیٹے اور باپ سمیت 3افراد جاں بحق 2شدید زخمی
آسمانی بجلی گرنے سے 2بیٹے اور باپ سمیت 3افراد جاں بحق 2شدید زخمی، تھانہ فقیروالی کے نواحی گاوں 102 سکس آر کے قریب آسمانی بجلی گرنے کا افسوس ناک واقعہ پیش آیا، ناصر نامی محنت کش اپنے بیوی بچوں کے ہمراہ گندم کی کٹائی کے لئے گیا ہوا تھا دوران بارش گندم کی کٹائی روک دی اور موٹرسائیکل پر سوار پوری فیملی واپس اپنے گاوں 123سکس آر رہے تھے کہ. 102 سکس آر کے قریب آسمانی بجلی گرنے سے 41سالہ ناصر اور اسکے دو بیٹے 7سالہ منیب 6سالہ عابد علی جاں بحق ہو گئے جبکہ ناصر کی بیوی 35سالہ ساجدہ اور5سالہ بیٹا احمد حسن شدید زخمی ہو گئے تھانہ فقیروالی پولیس نے زخمیوں کو تشویش ناک حالت میں تحصیل ہیڈکوارٹر ہسپتال ہارون آباد منتقل کر دیا گیا۔
