پشاور(صباح نیوز) خیبرپختوانخوا اسمبلی کے نومنتخب115 ارکان نے حلف اٹھا لیا۔ اسپیکر مشتاق غنی نے نومنتخب اراکین سے حلف لیا۔ صوبائی اسمبلی کا افتتاحی اجلاس صبح 11 بجے طلب کیا گیا تھا جو تقریبا پونے ایک بجے شروع ہوا۔اجلاس کے آغاز میں شہدا کے لیے فاتحہ خوانی کی گئی۔
خیبرپختوانخوا اسمبلی کے اجلاس سے قبل شدید بے نظمی دیکھنے میں آئی۔ گنجائش سے زیادہ افراد اسمبلی کی گیلری میں پہنچ گئے۔مسلم لیگ ن کی خاتون رکن ثوبیہ شاہد پر لوٹا، بوتلیں اوردیگر سامان پھینک دیا گیا ۔ مسلم لیگ (ن)کی رکن اسمبلی ثوبیہ شاہد ایوان میں کھڑے ہو کر ہاتھ میں پہنی جانے والی گھڑی دکھا رہی تھیں کہ اسمبلی میں موجود پی ٹی آئی کے کارکنوں نے ان پر خالی بوتل، جوتا، بال پین اور لوٹا پھینکا تاہم ثوبیہ جاوید مسلسل گھڑی دکھاتی رہیں۔ اس دوران اسمبلی میں موجود پی ٹی آئی کارکنان نے شدید نعرے بازی بھی کی۔ نامزد وزیراعلیٰ کے پی علی امین گنڈا پور بانی پی ٹی آئی کی تصویر کے ساتھ ایوان میں پہنچے۔
بانی پی ٹی آئی نے اسپیکر کے پی اسمبلی کے لیے بابر سلیم سواتی کو نامزد کردیا۔ اسد قیصر کے بھائی کو نامزد نہیں کیا گیا۔ذرائع کے مطابق اسد قیصر اپنے بھائی کے لیے بانی پی ٹی آئی سے منظوری لائے تھے۔ کے پی اسمبلی کے اسپیکر کے انتخاب کے لیے پولنگ کل ہوگی۔ نو منتخب اسمبلی کے افتتاحی اجلاس کے لیے سیکورٹی کے سخت انتظامات کیے گئے تھے۔
