اسلام آباد (صباح نیوز)نگراں وزیراعظم انوار الحق کاکڑ نے کہا ہے کہ غیر ملکی براہ راست سرمایہ کاری کے لئے بیوروکریٹک سرخ فیتے کے مسئلے پر بھی توجہ دی گئی ہے،خصوصی سرمایہ کاری سہولت کونسل آئندہ پانچ سالوں میں پاکستان میں 60 ارب ڈالر سے زائد کی سرمایہ کاری لانے میں مدد کرے گی ہ دسمبر تک سعودی عرب سے سونے اور تانبے کی کان کنی کے دنیا کے سب سے بڑے منصوبوں میں سے ایک ریکوڈک میں حصص خریدنے کے لیے ایک معاہدہ ہو جائے گا۔۔ ان خیالات کا اظہار انہوں نے عرب نیوز کو ایک انٹرویو میں کیا۔ اس سوال پر کہ کیا ایس آئی ایف سی کی اگلے پانچ سالوں میں پاکستان میں 60 بلین ڈالر تک کی سرمایہ کاری کرنے کی رپورٹس حقیقت پسندانہ ہیں، وزیر اعظم نے کہا کہ واقعی ایسا ہی ہے، بلکہ یہ شاید اس سے زیادہ بھی ہو سکتی ہے،ایس آئی ایف سی غیر ملکی سرمایہ کاروں کے کسی بھی قسم کے خدشات کو دور کرنے کے لیے “ون ونڈو آپریشن” کے طور پر کام کرے گی۔
وزیراعظم نے کہا کہ دو یا تین شعبوں پر پہلے ہی توجہ مرکوز ہے، جن میں سے ایک ڈالرز کی منتقلی ہے جو کسی بھی غیر ملکی براہ راست سرمایہ کاری ادارے کا مطالبہ ہے، یہ بیمہ شدہ اور قانونی طور پر محفوظ ہے۔ وزیراعظم نے کہا کہ بیوروکریٹک سرخ فیتے کے مسئلے پر بھی توجہ دی گئی ہے، ایس آئی ایف سی کے پلیٹ فارم پر ون ونڈو کا موقع بنیادی طور پر اس مقصد کے لیے تیار کیا گیا ہے کہ ہمیں ان تمام بیوروکریٹک رکاوٹوں کو ختم کرنے اور 15 دن کے اندر بیرون ملک سے کسی بھی سرمایہ کاری کی اجازت دینے کے پورے عمل کو معقول بنانے کی ضرورت ہے۔ انہوں نے کہا کہ ایس آئی ایف سی پلیٹ فارم کے تحت تنازعات کے حل کے طریقہ کار پر اتفاق کیا گیا ہے، یہ کافی حوصلہ افزا اور سازگار ہے، جو تمام بیرونی فریقوں کے لیے قابل قبول ہے، اس میں تنازعات کے حل کے طریقہ کار پر توجہ دی گئی ہے۔
ایک سوال کے جواب میں انہوں نے کہا کہ حکومت کو امید ہے کہ دسمبر تک سعودی عرب سے سونے اور تانبے کی کان کنی کے دنیا کے سب سے بڑے منصوبوں میں سے ایک ریکوڈک میں حصص خریدنے کے لیے ایک معاہدہ ہو جائے گا۔ وزیراعظم نے مزید کہا کہ ہم سعودی پیشکش پر کافی پرجوش ہیں اور ہم ان کی شرکت کی نہ صرف اس منصوبے میں بلکہ دوسری صورت میں بھی حوصلہ افزائی کریں گے۔ انہوں نے کہا کہ یہ مذاکرات کا حصہ ہے، جو تینوں فریقوں کے درمیان ہو رہے ہیں اور دیکھتے ہیں کہ اس کا کیا نتیجہ نکلتا ہے۔ اگست میں پاکستان نے اسلام آباد میں اپنی افتتاحی کان کنی کانفرنس میں سعودی عرب کے حکام کی میزبانی کی جہاں بیرک کے حکام بھی موجود تھے۔ بیرک اور سعودی سرکاری کان کنی کمپنی مشترکہ طور پر جدہ میں تانبے کا ایک پراجیکٹ چلاتی ہیں۔
