بیروت (صباح نیوز) اسرائیل نے لبنان کے مشرقی تاریخی شہر بعلبک میں تاریخی قلعے اور ایک گنجان آباد محلے کو نشانہ بنایا۔ شہید ہونے والوں کی تعداد40ہوگئی جب کہ درجنوں زخمی ہیں۔ ادھر لبنان کے جنوبی علاقے میں اسرائیلی بمباری میں حزب اللہ کے شہید سربراہ حسن نصر اللہ کے چچا اپنے 3 بیٹوں اور ایک پوتے سمیت شہید ہوگئے۔
عرب میڈیا کے مطابق اسرائیلی طیارے نے جنوبی لبنان کے ضلع صور کے قصبے البزوریہ جو حسن نصر اللہ کی جائے پیدائش بھی ہے کے ایک گھر پر بمباری کی جس میں 4 افراد شہید ہوگئے۔اس گھر کو حسن نصر اللہ کا آبائی گھر بھی کہا جاتا ہے۔
اسرائیلی بمباری میں شہید ہونے والوں میں حسن نصر اللہ کے چچا، ان کے 3 بیٹے اور ایک پوتا شامل ہیں۔یاد رہے کہ ستمبر کے مہینے میں حزب اللہ کے سربراہ حسن نصر اللہ لبنان میں تنظیم کے ہیڈکوارٹر پر اسرائیلی بمباری میں اپنے دو ساتھیوں سمیت شہید ہوگئے تھے۔جس کے بعد ان کے جانشین کے لیے مضبوط ترین امیدوار ہاشم صفی الدین کو بھی اسرائیل نے ایک حملے میں شہید کردیا تھا۔ حزب اللہ کے ان قائدین کی شہادتوں کے بعد عبوری سربراہ قاسم نعیم کو تنظیم کا نیا سربراہ منتخب کیا گیا ہے۔
