لندن(صباح نیوز)وفاقی وزیر داخلہ و چیئرمین پاکستان کرکٹ بورڈ محسن نقوی نے کہا ہے کہ قومی ٹیم کے کھلاڑی پراعتماد ہیں اور یقینا اچھا پرفارم کریں گے، ہر پاکستانی کو یہ انہیں یہ بتانا ہے کہ ہار جیت سے قطع نظر وہ اپنی ٹیم کے ساتھ ہیں، اس اپروچ کے ساتھ کھلاڑی یقینا امریکا سے ورلڈ کپ جیت کر وطن لوٹیں گے۔ وہ پاکستان ہاؤس میں برطانیہ میں پاکستانی ہائی کمشنر ڈاکٹر محمد فیصل کی جانب سے قومی کرکٹ ٹیم کے اعزاز میں منعقدہ تقریب سے خطاب کررہے تھے۔
مئیر لندن صادق خان، پاکستان میں برطانیہ کی ہائی کمشنر جین میریٹ ،سابق نگران وزیراعظم پاکستان انوارالحق کاکڑ،وزیر اعلی بلوچستان سرفراز بگٹی اور برطانیہ میں مقیم پاکستانیوں کی بڑی تعداد نے تقریب میں شرکت کی ۔وفاقی وزیرداخلہ محسن نقوی تقریب کے مہمان خصوصی تھے۔وزیر داخلہ نے کہا کہ قومی کرکٹ ٹیم کو اس وقت قوم کی سپورٹ کی ضرورت ہے۔ اپنے کھلاڑیوں پر بھروسہ رکھیں ۔ وہ اچھا کھیلیں گے اور پر امید رہیں کہ وہ ورلڈ کپ جیتں گے۔
میئر لندن صادق خان اور برطانیہ میں پاکستانی ہائی کمشنر نے بھی تقریب سے خطاب کیا۔وفاقی وزیرداخلہ محسن نقوی نے تقریب میں شرکت پر میئر لندن صادق خان اور برطانوی ہائی کمشنر جین میریٹ کا شکریہ ادا کیا ۔شرکا تقریب نے کھلاڑیوں سے آٹوگراف لئے اور تصویریں و سلفیاں بنوائیں۔میڈیا سے گفتگو میں محسن نقوی نے قوم سے اپیل کہ ہے کہ وہ قومی ٹیم کو ایک ماہ تک تنقید کا نشانہ نہ بنائیں۔
چیئرمین پی سی بی محسن نقوی نے کہا کہ قومی ٹیم ایک میچ ہار جائے تو پوسٹ مارٹم ہوتا ہے، ٹی20 ورلڈکپ کے دوران پاکستانی ٹیم پر تنقید نہ کریں بلکہ اپنی ٹیم کا ساتھ دیں۔محسن نقوی نے عوام سے قومی ٹیم کو سپورٹ کرنے کی اپیل کرتے ہوئے کہا کہ مجھے امید ہے کہ قومی ٹیم چار ہفتے بعد فائنل میں ہوگی، آنے والا مہینہ بہت اہم ہے، اس میں اپنی ٹیم کی بھرپور حوصلہ افزائی کریں۔چیئرمین پی سی بی نے مزید کہا کہ قومی ٹیم کے دماغ میں ایک بات ہو کہ قوم ہمارے ساتھ ہے تو وہ یہ ورلڈکپ جیت جائے گی۔
