کرک (صباح نیوز) کرک کے علاقے تپی عید گاہ کے قریب دو گروپوں میں تصادم کے دوران فائرنگ سے 2 افراد جاں بحق ہوگئے۔
تفصیلات کے مطابق خیبرپختونخوا کے ضلع کرک کے علاقے تپی عید گاہ کے قریب دو گروپوں کے مابین ہونے والے تصادم میں فائرنگ سے 2 افراد جاں بحق ہوگئے۔ مرنے والوں کی شناخت مبارک شاہ اور عبد السعید کے نام سے ہوئی۔
پولیس حکام کے مطابق فریقین کے مابین خواتین کا تنازعہ تھا، جس کے لئے جرگہ بلایا گیا تھا، تاہم اس دوران تلخ کلامی ہوئی اور دونوں جانب سے فائرنگ کا تبادلہ ہوگیا، فائرنگ میں 2افراد جاں بحق ہوگئے۔
واقعہ کی اطلاع ملتے ہی پولیس کی بھاری نفری جائے وقوعہ پر پہنچ گئی اور لاشوں کو تحویل میں لے کر پوسٹ مارٹم کے لئے سٹی ہسپتال منتقل کردیا گیا جبکہ جائے حادثہ سے شواہد اکٹھے کرکے تحقیقات شروع کردی گئیں۔
