اسلام آباد(صباح نیوز)امریکہ میں پاکستان کے سفیرمسعود خان نے کہا ہے کہ سیاحوں کو سہولیات دینے کیلئے پاکستان میں انفراسٹرکچر کو بہتربنایاجارہا ہے ، سیلیکون ویلی پاکستان کی سیاحت اور سیاحت کی صنعت کی ڈیجیٹلائزیشن میں مثبت کردار ادا کرسکتی ہے، بکنگ، رہائش، نقل و حمل اور درست معلومات کی دستیابی سمیت دیگر اہم معلومات کی ڈیجیٹلائزیشن سے پاکستانی سیاحت کے شعبے میں اہم اور بہتر تبدیلی رونما ہوگی، مشترکہ منصوبہ جات سے پاکستانی سیاحت کی موجودہ صلاحیت کو بروئے کار لانے میں نہ صرف مدد ملے گی بلکہ یہ منصوبہ جات بہت سودمند ہوں گے۔سفیر پاکستان مسعود خان نے ان خیالات کا اظہار سان فرانسسکو میں سالانہ اوپن سیلیکون ویلی فورم 2023 کے دوران منعقدہ خصوصی سیشن پاکستان کے سیاحتی ذخائر کی تلاش: پہاڑوں سے شہروں تک سے خطاب کرتے ہوئے کیا۔
مسعود خان نے سیشن کے منتظمین کا شکریہ ادا کیا اور اس امید کا اظہار کیا کہ وہ یہاں کے افراد کو پاکستان آنے کی ترغیب دیں گے جس سے وہ پاکستان کی لازوال خوبصورتی کو قریب سے دیکھنے کا تجربہ حاصل کریں گے۔سفیر پاکستان نے کہا کہ آپ پاکستان کا دورہ کریں جہاں آپ نہ صرف پاکستان کے منفردجغرافیہ، بلند ترین پہاڑوں، صحرا وں اور دلکش ساحلوں سے لطف اندوز ہوں گے۔مسعود خان نے کہا کہ پاکستان کے لوگ مہمان نواز ہیں اور ہم محبت کرنے اور خیال رکھنے سمیت مہمانوں کو خوش آمدید کہنے کیلئے مشہور ہیں۔سفیر پاکستان نے کہا کہ پاکستان اور خطے کی تاریخ 5000 قبل مسیح کی ہے جہاں قدیم تہذیبوں کے آثار ابھی تک موجود ہیں۔ اس خطے کی تاریخ بدھ مت، ہندو مت سمیت اسلام کی شاندار تاریخ سے عبارت ہے۔سفیر پاکستان مسعود خان نے کہا کہ ہماری تہذیب مختلف ثقافتوں کا گلدستہ ہے۔
مسعود خان نے کہا کہ پاکستان سیاحوں کیلئے ایک پرکشش مقام ہے جہاں سیاحت کے شعبے میں سب کچھ ہے۔ملک میں سیاحت کی مختلف اقسام پر روشنی ڈالتے ہوئے سفیر پاکستان نے کہا کہ پاکستان میں بزنس، ایڈونچر، مذہبی، ایکو ٹورازم، واٹر اسپورٹس اور پیرا گلائیڈنگ سمیت مختلف شعبہ جات سیاحوں کیلئے دلچسپی کا باعث ہیں۔سفیر پاکستان نے کہا کہ ملک میں سیاحت کی صنعت مضبوط ہے اور لاکھوں سیاح مختلف مقامات کا دورہ کرتے ہیں۔مسعود خان نے کہا کہ پاکستان میں انفراسٹرکچر کو بہتر بنایا جا رہا ہے تاکہ بین الاقوامی سیاحوں کو مزید سہولیات دی جائیں۔سفیر پاکستان نے کہا کہ کہ ایکو سسٹم انتہائی نازک ہے اور ماحولیاتی انحطاط کو روکنے کے لیے احتیاط سے نمٹنے کی ضرورت ہے۔مسعود خان نے کہا کہ پاکستان میں کچھ مقامات انتہائی قدیم ہیں اور ہمیں ان پر فخر ہے اور ہم چاہتے ہیں کہ سیاح بھی ان مقامات سے لطف اندوز ہوں۔
