پشاور(صباح نیوز) خیبر پختونخوا کے مختلف علاقوں میں تیز ہواؤں کے ساتھ موسلادھار بارش کے باعث دیواریں اور چھتیں گرنے سے جانی نقصان ہوا ہے ۔ بنوں میں طوفانی بارش کے دوران دیواریں اور چھتیں گرنے اور دیگر حادثات میں 4 افراد جاں بحق اور 25 زخمی ہوگئے۔ بنوں میں طوفانی بارش کے دوران مختلف علاقوں میں مکانات کی دیواریں اور چھتیں گرنے کے نتیجے میں چار افراد ہلاک اور 25 زخمی ہوگئے۔
ریسیکیو 1122 نے جاں بحق افراد کی لاشوں اور زخمیوں کو اسپتال منتقل کردیا جبکہ شہر کے تینوں سرکاری اسپتالوں میں ایمرجنسی نافذ کردی گئی۔ریسکیو 1122 کے اہلکاروں کے مطابق علاقہ سورانی میں بارش سے دیوار گرنے سے 3 بچے اور خوجڑی میں دیوار گرنے سے ایک شخص شدید زخمی ہوا۔ اسی طرح چار مری میں بھی دیوار گرنے سے 5 افراد زخمی ہوئے۔دیگر علاقوں سے بھی زخیوں کو اسپتال منتقل کیا گیا ہے جبکہ ہلاکتوں میں اضافے کا خدشہ ظاہر کیا جارہا ہے۔ دیواریں اور چھتیں گرنے کے تمام واقعات مضافاتی علاقوں میں پیش آئے ہیں۔
دریں اثنا ریسکیو1122 حکام کے مطابق لکی مروت کی تحصیل نورنگ میں طوفانی بارش کی وجہ سے پولیس اسٹیشن کے سامنے برآمدے کی چھت گرنے سے ایک شخص زخمی ہوگیا۔منجی والا کے قریب تیز آندھی کی وجہ سے پشاور سے کراچی جانے والا ٹرک بے قابو ہو کر الٹ گیا جس کے نتیجے میں ایک شخص زخمی ہوگیا۔ریسکیو 1122 کی میڈیکل ٹیم نے زخمی کو ابتدائی طبی امداد فراہم کرنے کے بعد تحصیل ہیڈکوارٹر ہاپتال سرائے نورنگ منتقل کر دیا۔
