لاہور (صباح نیوز)پاکستان سپر لیگ (پی ایس ایل) کے آٹھویں ایڈیشن کی ٹرافی کی لاہور میں رونمائی کردی گئی۔پاکستان سپر لیگ انتظامیہ نے اس ٹرافی کو سپر نووا کا نام دیا ہے، جس کے اوپر ایک ستارہ بھی لگایا گیا ہے۔
سماجی رابطوں کی ویب سائٹ ٹوئٹر پر پی ایس ایل ٹرافی کی تصاویر شیئر کی گئیں۔پی ایس ایل 8 کی ٹرافی کی رونمائی کی تقریب لاہور کے تاریخی مقام شالیمار باغ میں ہوئی، جس میں تمام فرنچائزز کے مالکان سمیت کھلاڑیوں نے شرکت کی۔پی ایس ایل انتظامیہ کی جانب سے جاری کی گئی پریس ریلیز کے مطابق رواں سیزن کی ٹرافی 24 قیراط سونے سے پاکستان میں ہی بنائی گئی ہے،
سپر نووا میں 9 ہزار سے زائد زرقون لگائے گئے ہیں۔رپورٹ کے مطابق پی ایس ٹرافی کے 3 ستون ہیں جو کہ پاکستان کرکٹ ٹیم کے نصب العین اتحاد، جذبہ اور قوت کی عکاسی کرتے ہیں۔پاکستان سپر لیگ کے 8ویں ایڈیشن کا پہلا میچ پیر 13 فروری کو ملتان میں دفاعی چیمپئن لاہور قلندرز اور ملتان سلطانز کے درمیان کھیلا جائے گا۔
