اسلام آباد(صباح نیوز) وزیراعظم عمران خان نے کہاہے کہ ہر ملٹری کارروائی کے نتائج ٹھیک نہیں ہوتے، میں ڈپلومیسی اور ڈائیلاگ پر یقین رکھتا ہوں، آسٹریلیا اور پاکستان کے درمیان فیصلہ کن میچ تب ہوں گے جب پچز اچھی بنائی جائیں گی۔
آسٹریلوی میڈیا کو انٹرویو دیتے ہوئے عمران خان نے کہا کہ پاکستان کرکٹ سے محبت کرنے والی قوم ہے لیکن دہشت گردی کے باعث کئی سال سے انٹرنیشنل کرکٹ کی میزبانی سے محروم رہے۔
عمران خان نے کہا کہ آسٹریلین کرکٹ ٹیم کے دورہ پاکستان کا انتظار کافی عرصے سے کر رہے تھے، آسٹریلوی ٹیم کو صدارتی سطح کی سکیورٹی دی جا رہی ہے، ہماری حکومت نے ملک کے اندر سیکورٹی حالات کو بہتر بنایا ہے۔پاکستانی قوم آسٹریلیا کے ساتھ سیریز کا جوش و خروش کیساتھ انتظار کررہی تھی اور ایک کھلاڑی کی اصلی آزمائش ٹیسٹ کرکٹ میں ہوتی ہے۔
پاکستان اور آسٹریلیا کے درمیان ٹیسٹ سیریز اسٹیڈیم میں جاکر دیکھنے سے متعلق سوال پر عمران خان کا کہنا تھا کہ سیاسی مصروفیات کے باعث کرکٹ دیکھنے کا وقت نہیں ملتا لیکن اخبار میں چیزیں پڑھتا رہتا ہوں۔
قومی ٹیم کے سابق کپتان کا یہ بھی کہنا تھا کہ آسٹریلیا اور پاکستان کے درمیان فیصلہ کن میچ تب ہوں گے جب پچز اچھی بنائی جائیں گی۔
ایک سوال کے جواب میں وزیراعظم عمران خان کا کہنا تھا کہ ہر ملٹری کارروائی کے نتائج ٹھیک نہیں ہوتے، میں ڈپلومیسی اور ڈائیلاگ پر یقین رکھتا ہوں۔
